سرگودھا، 20 اپریل(اے پی پی): نیازی میڈیکل اینڈ ڈینٹل کالج سرگودھا کے زیر اہتمام نسل نو میں منفی رجحانات کے خاتمے اور مثبت رجحانات کو پروان چڑھانے کے نظریے کے تحت سالانہ سپورٹس گالا 2024ء کا باقاعدہ آغاز ہو گیا ہے۔
نیازی میڈیکل اینڈ ڈینٹل کالج سرگودھا کے زیر اہتمام سالانہ سپورٹس گالا کا آغاز، چیئرمین ڈاکٹر عبد الغفور نیازی نے فیتہ کاٹ کر اور بعد ازاں فٹ بال کو کک لگا کر گول کرتے ہوئے سپورٹس گالا کا افتتاح کیا ,سپورٹس گالا 7 یوم تک جاری رہے گا۔
چیئرمین ڈاکٹر عبدالغفور نیازی نے تقریب سے خطاب کرتے ہوئے کہا کہ آج کے بچے ہمارا مستقبل ہیں اور انہیں آنے والے کل میں ملک و قوم کی باگ دوڑ سنبھالنی ہے اس لئے ان بچوں کو نہ صرف آئندہ چیلنجز کا سامنا کرنے کیلئے تیار کرنا ضروری ہے بلکہ ان میں مثبت رجحانات کے فروغ کیلئے بھی ہمیں اجتماعی جدوجہد کرنا ہوگی۔
انہوں نے کہا کہ کالج میں ہر سال سپورٹس گالا کا اہتمام بھی اسی سلسلے کی ایک کڑی ہے تاکہ نونہلان قوم میں مقابلہ بازی کے مثبت رجحان کو پروان چڑھایا جاسکے۔
تقریب سے پرنسپل میڈیکل کالج پروفیسر ڈاکٹر سید حیدر رضا، پرنسپل ڈینٹل کالج پروفیسر ڈاکٹر میاں فرخ عمران، پرنسپل فارما ڈی ڈاکٹر فاطمہ اکبر شیخ، پرنسپل ڈی پی ٹی ڈاکٹر جبران ارشد، چیئرمین سپورٹس گالا پروفیسر ڈاکٹر محمد جاوید اعوان اور وائس چیئرمین پروفیسر ڈاکٹر شہزاد اسلم نے بھی خطاب کیا اورسپورٹس گالا کے باوقار انعقاد کے حوالے سے پروفیسر ڈاکٹر حمیرا شوکت، ڈاکٹر رخشندہ جبیں، ڈاکٹر نعیم یعقوب، ڈاکٹر صائمہ تبسم اور ڈاکٹر فیصل جاوید کی عملی کاوشوں کو سراہا گیا۔
