“صحت کی دستک ان کی دہلیز پر” پروگرام عوام کے لئے بہت جلد شروع کیا جارہا ہے؛خواجہ عمران نزیر

لاہور، 28 اپریل(اے پی پی): صوبائی وزرا صحت خواجہ عمران نذیر اور خواجہ سلمان رفیق کی زیر صدارت انسولین سمیت شوگر کی ادویات کی دستیابی کے حوالہ سے اہم اجلاس منعقد ہوا جس میں  شوگر، ہیپاٹائٹس کی ادویات کی دستیابی اور فراہمی کے طریقہ کار کا تفصیلی جائزہ لیا گیا۔اجلاس میں شوگر کے مریضوں کے لئے انسولین کی تیاری، مارکیٹ میں دستیابی کے امور بھی زیر بحث آئے۔

 خواجہ عمران نذیر نے گفتگو کرتے ہوئے کہا کہ وزیر اعلی پنجاب مریم نواز شریف کے ویژن کے تحت “صحت کی دستک ان کی دہلیز پر” پروگرام عوام کے لئے بہت جلد شروع کیا جارہا ہے،انہوں نے کہا کہ موبائل ہیلتھ پروگرام کے تحت الٹراساؤنڈ کی سہولت بھی مریضوں کے گھروں تک فراہم کرنے کا فیصلہ کیا گیا ہے۔ انھوں نے کہا کہ انسولین، شوگر، ہیپاٹائٹس کی ادویات بھی مریضوں کے گھروں میں پہنچانے کا میکانزم وضع کرلیا گیا ہے، سرکاری ہسپتالوں میں شوگر کے مریضوں کے لئے انسولین وافر مقدار میں موجود ہیں۔

 خواجہ عمران نذیر نے کہا کہ پریوینٹو  کئیر سسٹم کے ذریعے بیماریوں پر قابو پایا جا سکتا ہے۔انہوں نے نان کمونیکیبل ڈیزیز(این سی ڈی)  پروگرام سے ذیابیطس، ہیپاٹائیٹس کے مریضوں کی سکریننگ، دیگر ریکارڈ مانگ لیا۔انھوں نے کہا کہ ذیابیطس، ہیپاٹائیٹس کے مریضوں کے مکمل ڈیٹا کے بغیر پروگرام کامیابی سے ہمکنار نہیں ہوسکتا۔

صوبائی وزیر صحت خواجہ سلمان رفیق نے اظہار خیال کرتے ہوئے کہا کہ وزیر اعلی پنجاب عوام کو گھروں تک طبی سہولیات پہنچانے کے لئے خصوصی دلچسپی لے رہی ہیں۔ کلینکس آن ویلز  کے ذریعے شہروں کے تنگ علاقوں، دیہی آبادیوں میں صحت کی بنیادی سہولیات فراہم کی جائیں گی۔ صوبائی وزیر نے کہا کہ ہسپتالوں کی ریویمپنگ کا عمل تیزی سے مکمل کیا جارہا ہےاجلاس میں سیکرٹری صحت علی جان خان نے نان کمونیکیبل ڈیزیز(این سی ڈی)پروگرام کے تحت فراہم کردہ طبی سہولیات سے آگاہ کیا۔

اجلاس میں سیکرٹری صحت علی جان خان، ڈاکٹر عدنان، ڈاکٹر زاہد پرویز، ڈاکٹر عثمان،  سپیشل سیکرٹری صحت راجہ منصور، سی ای او پی ایچ ایف ایم سی ڈاکٹر عاصم الطاف موجود تھے۔