اسلام آباد،29 اپریل (اے پی پی):پاکستان نیشنل کونسل آف دی آرٹس نے پیر کو عالمی یوم رقص کے موقع پر لوک، کلاسیکل اور صوفی رقص کی پرفارمنس کا اہتمام کیا۔وفاقی سیکرٹری قومی ورثہ و ثقافت احسن ناصر جامی اس موقع پر مہمان خصوصی تھے۔
تقریب سے خطاب میں وفاقی سیکرٹری نے کہا کہ عالمی یوم رقص کا مقصد رقص کی موروثی قدر کے بارے میں بیداری پیدا کرنا اور ڈانس کمیونٹی کو اپنے کام کو وسیع تر سامعین کے سامنے دکھانے کے لیے بااختیار بنانا تھا۔انہوں نے عالمی یوم رقص منانے کی اہمیت پر روشنی ڈالی جس کے ذریعے رقص کی متنوع شکلوں کو فروغ دینے اور مختلف اقوام کے ثقافتی ورثے کو محفوظ کیا جا سکتا ہے۔
ڈائریکٹر جنرل پی این سی اے محمد ایوب جمالی نے کہا کہ پاکستان کے مختلف خطوں میں لوک رقص لوگوں کے مزاج، پیشہ اور ماحول کی عکاسی کرتا ہے۔
