لاہور، 19 اپریل (اے پی پی):وزیراعلیٰ پنجاب مریم نواز شریف کا کہنا ہے کہ وہ لاہور سمیت پنجاب کے بڑے شہروں کو عالمی سطح پر آئی ٹی حب بنانا چاہتی ہوں۔
ان خیالات کا اظہار انہوں نے اپنے زیر صدارت خصوصی اجلاس میں کیا۔ اجلاس میں نواز شریف آئی ٹی سٹی کے پراجیکٹ پر پیشرفت کا جائزہ لیاگیا۔ سی ای او سی بی ڈی عمران امین نے چین میں روڈشوز پر رپورٹ پیش کی۔اجلاس کو بتایا گیا کہ پاکستان کے سب سے بڑے اور پہلے آئی ٹی سٹی میں 16 چینی کمپنیوں نے دلچسپی کا اظہار کیا،چین کی 8 کمپنیاں نواز شریف آئی ٹی سٹی میں فوری طور پر کام کرنے کے لئے تیار ہیں۔ اجلاس کو بتایا گیا کہ سنگا پور،انگلینڈ، ابو ظہبی اور دیگر ممالک میں بھی آئی ٹی سٹی کے لئے روڈ شوزپیش کیے جائیں گے، ملک بھر میں نواز شریف آئی ٹی سٹی کے لئے رواں ماہ سے اگست تک روڈ شوز منعقد کیے جائیں گے۔ مریم نواز نے آئی ٹی سٹی کے لئے دنیا کی بہترین آرکیٹکچرل کمپنیز کی خدمات حاصل کرنے کی ہدایت دیدی، انہوں نے نواز شریف آئی ٹی سٹی میں بزنس کال سنٹرزکے لئے دو ٹاورز مختص کرنے کی تجویز کا جائزہ لیا ۔ مریم نواز شریف نے نواز شریف آئی ٹی سٹی پراجیکٹ مقررہ مدت میں مکمل کرنے کی ہدایت دیتے ہوئے کہا کہ لاہور سمیت پنجاب کے بڑے شہروں کو عالمی سطح پر آئی ٹی حب بنانا چاہتے ہیں۔ اجلاس میں سینئر صوبائی وزیر مریم اورنگزیب،سینیٹر پرویز رشید، ایم پی اے ثانیہ عاشق،سنٹرل بزنس ڈسٹرکٹ پنجاب کے سی او او بریگیڈئر ریٹائرڈ منصور جنجوعہ اور دیگر حکام نے شرکت کی۔
