لاہور، 25 اپریل(اے پی پی): صوبائی وزیر صحت خواجہ عمران نذیر سے لیڈی ہیلتھ سپروائزرز کے نمائندوں نے ملاقات کی۔ ملاقات کے دوران لیڈی ہیلتھ سپروائزرز نے اپنے مطالبات، مسائل سے صوبائی وزیر صحت کو آگاہ کیا۔
اس موقع پر صوبائی وزیر پرائمری اینڈ سیکنڈری ہیلتھ کئیر خواجہ عمران نذیر نے کہا کہ محکمہ صحت کی بہتری اور مسائل کے حل کے لئے وزیر اعلی پنجاب پر عزم ہے۔انہوں نے کہا کہ بنیادی اور دیہی مراکز صحت کی ریوپمنگ سے عوام کو طبی سہولیات انکی دہلیز پر دستیاب ہوں گی۔انہوں نے کہا کہ لیڈی ہیلتھ سپروائزرز، لیڈی ہیلتھ ورکرز، لیڈی ہیلتھ وزیٹرز کے تمام مسائل میرٹ پر حل کئے جائیں گے۔
خواجہ عمران نذیر کی انتظامیہ کو ہدایت دیتے ہوئے کہا کہ لیڈی ہیلتھ سپروائزرز کے زیر التوا واجبات فوری ادا کئے جائیں۔ انھوں نے کہا کہ نظم و ضبط، سرکاری فرائض میں غفلت پر کوئی سمجھوتہ نہیں کیا جائے گا۔ محکمہ صحت کے ملازمین فیملی کی طرح ہیں، انکے مسائل ترجیحی بنیادوں پر حل کئے جائیں گے۔
