ٹیچنگ ہسپتال ساہیوال کی اہم کامیابی،6 مستحق نابینا مریضوں کو بینائی کی نعمت لوٹا دی

25

ساہیوال،07اپریل(اے پی پی): ٹیچنگ ہسپتال ساہیوال کی اہم کامیابی، شعبہ امراضِ چشم  یونٹ 2 میں 6 مستحق نابینا مریضوں کو بینائی کی نعمت لوٹا دی گئی،ان مریضوں کو قورنیا ٹرانسپلانٹ کے ذریعے بینائی لوٹائی گئی۔

اس حوالے سے اسسٹنٹ پروفیسر ڈاکٹر محمد رضوان نے بتایا کہ شعبہ امراضِ چشم پنجاب ہیومن آرگن ٹرانسپلانٹ اتھارٹی سے باضابطہ طور پر کارنیا ٹرانسپلانٹ کے لیے منظور شدہ ہے اور اسی ضمن میں مستحق مریضوں کو بلکل مفت یہ سہولت میسر کی گئی ہے جو عام طور پر 10 سے 12لاکھ روپے مالیت کا آپریشن ہے۔

ڈاکٹر محمد رضوان نے خصوصی طور پر بیرون ملک مقیم ڈاکٹر نائلہ رفیق اور ڈاکٹر فواد کا شکریہ ادا کیا جنکی کاوشوں اور بھرپور معاونت سے امریکہ سے عطیہ کیے ہوئے کارنیا بروقت اور باحفاظت ساہیوال پہنچے اور یہ آپریشنز ممکن ہو سکے۔ انہوں نے بتایا کہ اب تک کل 20 مریض اس سہولت سے فائدہ اٹھا چکے ہیں۔

 ڈاکٹر محمد رضوان نے آپریشن میں معاونت کے لیے انایستھزیا ڈیپارٹمنٹ کے سربراہ ڈاکٹر عمر اجمل، ڈاکٹر محمد شاہد اور ڈاکٹر حمیرا کا بھی شُکریہ ادا کیا۔انہوں نے کہا کہ جو شخص بھی بینائی سے محروم ہے تو وہ ساہیوال ٹیچنگ ہسپتال کے شبہ امراضِ چشم میں اپنی رجسٹریشن کروائیں۔