لاہور،19اپریل(اے پی پی): ترجمان پی ڈی ایم اے کے مطابق پنجاب میں 23 اپریل سے بارشوں کا نیا سلسلہ داخل ہو گا۔ اپر پنجاب کے علاقوں میں 23اپریل کو ہلکی بارش کا امکان ہے جبکہ 26 سے 29 اپریل اپر پنجاب میں گرج چمک کے ساتھ طوفانی بارش اور ژالہ باری کاامکان: 18سے 21اپریل کے دوران بارشوں کا الرٹ پہلے ہی سے پنجاب بھر میں جاری کیا جاچکا ہے ۔ پی ڈی ایم اے نے کسانوں کیلئے ہدایت جاری کرتے ہوئے کہا ہے کہ کسان گندم کی فصل کی کٹائی موسم کی صورتحال کو مدنظر رکھتے ہوئے کریں۔ ڈی جی پی ڈی ایم اے عرفان علی کاٹھیا نے کہا کہ وزیر اعلیٰ پنجاب مریم نواز کی ہدایات کے مطابق انتظامیہ چوبیس گھنٹے الرٹ ہے۔ موسم کی نئی صورتحال سے بھی صوبہ بھر کی ضلعی انتظامیہ کو آگاہ کردیا گیاہے ۔ پی ڈی ایم اے لمحہ بہ لمحہ موسمی صورت حال پر نظر رکھے ہوئے ہے۔ ڈی جی پی ڈی ایم اے کے مطابق ریسکیو ادارے،ضلعی انتظامیہ کے لئے اگلے دس دن انتہائی اہمیت کے حامل ہیں۔ قدرتی طوفان، بارشوں سے کم سے کم نقصان ہو اس کے لئے ہرممکن کوشش کی جائے گی۔ ڈی جی پی ڈی ایم اے نے شہریوں سے گزارش کی کہ طوفان میں بجلی کے کھمبوں سے دوررہیں ، ایمرجنسی میں متعلقہ ضلعی انتظامیہ سے رابطہ رکھیں۔
