پشاور،31 مارچ(اے پی پی): گورنر خیبرپختونخوا حاجی غلام علی نے پشاور میں مقیم 300 خواجہ سراؤں میں گورنر ہاوس میں رمضان راشن تقسیم کیا۔
اس موقع پر منعقدہ تقریب سے خطاب میں گورنر حاجی غلام علی نے کہا کہ دو دن پہلے خواجہ سرا نمائندہ وفد سے گورنر ہاؤس ملاقات میں انکے مسائل سنے تو بہت دکھ ہوا، خواجہ سراؤں کو علاج معالجہ، قبرستان میں تدفین، نمازہ جنازہ ادائیگی، روزگار و فنی تربیت کے مطالبات کا حل یقینی بناؤں گا۔انہوں نے کہا کہ ہسپتالوں میں خواجہ سراؤں کے بہتر علاج معالجہ کیلئے الگ واردز میں طبی سہولیات فراہم کریں گے کیونکہ خواجہ سرا بھی پاکستانی شہری ہیں، مسائل کا حل فرض سمجھتے ہیں۔
گورنر حاجی غلام علی نے کہا کہ خواجہ سرا معاشرے کا مظلوم طبقہ ہیں انکا مقدمہ وفاقی و صوبائی حکومت تک پہنچاؤں گا اور مسائل کا حل بھی یقینی بناؤں گا، صوبائی حکومت سے بات کی جائے گی کہ وہ ریلیف پیکجز میں خواجہ سراؤں کو بھی شامل کرے۔
خواجہ سرا آرزو، فرزانہ اور صوبیا کی سربراہی میں خواجہ سراؤں نے عزت افزائی و مالی امداد پر گورنر اور مئیر پشاور کا شکریہ ادا کرتے ہوئے کہا کہ گورنر ہاؤس کی 76 سالہ تاریخ میں پہلی مرتبہ خواجہ سراؤں کیلئے گورنر ہاؤس کے دروازے کھولے گئے اور مالی امداد کی گئی۔انہوں نے کہا کہ ہماری کمیونٹی کو ہمیشہ نظر انداز کیا جاتا ہے، گورنر ہاؤس مدعو کر کے عزت افزائی کی گئی۔
مئیر پشاور حاجی زبیرعلی، سابق نگران صوبائی وزراء عدنان جلیل، فضل الٰہی سمیت 300 کے قریب خواجہ سرا، اور دیگر میڈیا نمائندگان نے بھی اس تقریب میں شرکت کی۔
