لاہور، 8 مئی ( اے پی پی ): وزیر بلدیات ذیشان رفیق نے کہا کہ تین ماہ کے اندر لاہور کی ٹوٹی گلیوں اور نالیوں کی مرمت یقینی بنائیں گے، چیف منسٹر ری ویمپنگ پلان لاہور کی 92 فیصد آبادی کو کوور کرے گا، ری ویمپنگ پلان سے صوبائی دارالحکومت کی ایک نئی شکل سامنے آئے گی۔
ان خیالات کا اظہار انہوں نے بدھ کو یہاں ایک اجلاس کی صدارت کرتے ہوئے کیا۔ وزیر خزانہ مجتبیٰ شجاع الرحمان ،معاون خصوصی وزیراعلی ذیشان ملک، لاہور سے منتخب ارکان اسمبلی، ٹکٹ ہولڈرز نے اجلاس میں شرکت کی۔کمشنر لاہور، ڈپٹی کمشنر، ایم ڈی واسا اور دیگر متعلقہ محکموں کے سربراہ نے اجلاس میں شرکت کی ۔اجلاس میں منتخب عوامی نمائندوں کے حلقوں کے مسائل اور ترقیاتی سکیموں کا جائزہ لیا گیا ۔
اجلاس میں وزیراعلیٰ مریم نواز شریف کی ہدایت پر لاہور ری ویمپنگ پلان پر تفصیلی غور کیا گیا۔ڈپٹی کمشنر/ ایڈمنسٹریٹر لاہور رافعہ حیدر نے اجلاس کو اب تک کی پیشرفت پر بریفنگ دی ۔
اجلاس سے خطاب کرتے ہوئے وزیر بلدیات ذیشان رفیق نے کہا کہ وزیراعلی پورے صوبے میں مرحلہ وار عوامی مسائل کا حل چاہتی ہیں، مریم نواز شریف نے تمام متعلقہ اداروں کی مکمل کوآرڈینیشن کی ہدایت کی ہے۔
اجلاس میں گفتگو کرتے ہوئے وزیر خزانہ مجتبیٰ شجاع الرحمان نے کہا کہ تمام ارکان اسمبلی کی شکایات کا فوری ازالہ کیا جائے گا، وزیراعلی نے لاہور کیلئے تاریخی پیکیج دیا، منتخب نمائندوں کو اعتماد میں لیا جا رہا ہے،تمام فلٹریشن پلانٹس کو مکمل فعال بنایا جائے گا، نئے سال کے بجٹ میں مزید فنڈز فراہم کئے جائیں گے ۔
ارکان اسمبلی اور ٹکٹ ہولڈرز نے منتخب نمائندوں کی تجاویز مدنظر رکھنے پر وزیراعلیٰ سے اظہار تشکرکیا اور کہا کہ وزیراعلیٰ کے ویژن سے مکمل اتفاق کرتے ہیں، بھرپور تعاون کریں گے۔
