سکھر،20مئی(اے پی پی): کمشنر فیاض حسین عباسی نے ڈپٹی کمشنر ڈاکٹر ایم بی راجہ دھاریجو کے ہمراہ سکھر سٹی، نیو سکھر اور روہڑی کے مختلف عوامی مقامات ڈولفن چوک، گھنٹہ گھر چوک، ایوب گیٹ، نیو گوٹھ، تانگہ اسٹینڈ، کیمپ نزد کمشنر آفس، شاہی بازار روہڑی، اولڈ سکھر، شالیمار اور دیگر مقامات پر قائم ہیٹ ویو ریلیف کیمپس کا دورہ کیا۔ انہوں نے عوام سے اپیل کی کہ سکھر ڈویژن میں آئندہ 10 روز گرمی کی لہر کے دوران تمام احتیاطی تدابیر اختیار کریں۔ یہ شدید گرمی کی لہر ہوگی اور درجہ حرارت 6 سے 8 ڈگری تک بڑھنے کا امکان ہے۔ عوام صبح 11 بجے سے سہ پہر 3 بجے تک باہر نکلنے سے گریز کریں، زیادہ پانی پیئیں، باہر نکلتے وقت سر ڈھانپیں اور بوڑھوں اور بچوں کا خاص خیال رکھیں۔
