پتوکی، 29 مئی ( اے پی پی): وزیراعلیٰ پنجاب مریم نواز نے پتوکی اور کبیروالہ میں خسرہ سے بچوں کی ہلاکتوں کا نوٹس لے لیا ، صوبائی وزیر صحت خواجہ عمران نذیر نے پتوکی کا ہنگامی دورہ کیا اور خسرہ آئیسولیشن وارڈ میں زیر علاج بچوں کی خیریت دریافت کی۔
پتوکی کے نواحی علاقے ٹھٹہ کمیانہ، دولو گرو اور دیگر میں خسرے سے جاں بحق ہونے والے بچوں کی تعداد سات ہوگئی ہے ، جس پر وزیراعلی پنجاب مریم نواز نے معاملے کا نوٹس لیا تو صوبائی وزیرِ صحت خواجہ عمران نذیر، سیکرٹری ہیلتھ علی جان اور دیگر ٹیم پتوکی پہنچ گئی جہاں انہوں نے تحصیل ہیڈکوارٹر ہسپتال پتوکی میں قائم خسرے کے آئیسولیشن وارڈ کا دورہ کیا اور متاثرہ بچوں کی خیریت دریافت کی۔ انہوں نے ایک مریض سے ویکسینیشن سے متعلق پوچھا اور انہیں ویکسینیشن نا کروانے پر اپنے بچوں کی صحت کا دھیان رکھنے اور ویکسینیشن کروانے سے متعلق آگاہی دی،۔
اس موقع پر میڈیا سے گفتگو کرتے ہوئے صوبائی وزیر صحت خواجہ عمران نذیر کا کہنا تھا کہ ابھی تک جاں بحق ہونے والے بچوں میں خسرے کی علامات رپورٹ نہیں ہوئیں اور تین دن تک انکی رپورٹ سامنے آجائے گی اور اگر کوئی ذمہ دار پایا گیا تو انکے خلاف محکمانہ کارروائی ہوگی۔ انکا کہنا تھا کہ متاثرہ علاقہ میں اسپیشل ٹیمیں تعینات کردی گئیں ہیں جو گھر گھر جاکر معائنہ کررہی ہیں۔ انکا کہنا تھا وزیراعلی مریم نواز صحت کی سہولیات لوگوں کے گھروں میں پہنچا رہی ہیں اس کے علاؤہ پتوکی میں 16 بچے زیر علاج ہیں اور انہیں صحت کی سہولیات فراہم کی جارہی ہیں، اور انکا علاج مفت ہورہا ہے۔
