لاہور۔ 17 مئی(اے پی پی): صوبائی وزیر محکمہ صحت و ایمرجنسی سروسز خواجہ سلمان رفیق کی زیر صدارت ایمرجنسی ہیڈ آفس میں اہم اجلاس منعقد منعقد ہوا۔
اجلاس میں سیکرٹری ایمرجنسی سروسز پنجاب ڈاکٹر رضوان نصیر، ڈپٹی ڈائریکٹر فنانس اعجاز ورک، ہیڈ آف لاء اینڈ ایڈمنسٹریشن علی حسن، ڈی ڈی آر اینڈ ایم توحید، ہیڈ آف انفارمیشن دیبا شہناز و دیگر افسران نے شرکت کی۔
صوبائی وزیر محکمہ صحت و ایمرجنسی سروسز پنجاب نے اجلاس کے دوران موٹر بائیک سروس کی کارکردگی، سالانہ ترقیاتی منصوبوں، ایئر ایمبولینس سروس، لائف سیور پروگرام اور موٹروے پر سروس کا تفصیلی جائزہ لیا۔سیکرٹری ایمرجنسی سروسز پنجاب ڈاکٹر رضوان نصیر و دیگر افسران نے اس حوالہ سے تفصیلات سے آگاہ کیا۔
صوبائی وزیر صحت خواجہ سلمان رفیق نے ایمرجنسی رسپونس سنٹر کا بھی دورہ کرکے اوور آل ورکنگ کا جائزہ لیا۔صوبائی وزیر محکمہ صحت و ایمرجنسی سروسز خواجہ سلمان رفیق نے اظہار خیال کرتے ہوئے کہا کہ ایمرجنسی سروسز پنجاب لوگوں سے بھلائی کا محکمہ ہے۔ فیلڈ سٹاف کی استدکار بڑھانے پر خاص توجہ دی جا رہی ہے۔ وزیر اعلیٰ پنجاب مریم نواز شریف کی جانب سے عوام کیلئے ایئر ایمبولینس سروس ایک بہترین تحفہ ہے۔
اجلاس میں موٹروے پر ایمرجنسی سروسز کیلئے اقدامات کا جائزہ لیا گیا ہے۔ خواجہ سلمان رفیق نے کہا کہ موٹر بائیک سروس کی مزید بہتری کے اقدامات بھی اٹھائے جا رہے ہیں۔ محکمہ ایمرجنسی سروسز پنجاب کی جانب سے عوامی منصوبوں کا ہر ہفتے جائزہ لیا جائے گا۔سیکرٹری محکمہ ایمرجنسی سروسز پنجاب ڈاکٹر رضوان نصیر نے کہا کہ اب تک بیس لاکھ شہریوں کو ایمرجنسی سروسز فراہم کر چکے ہیں۔
