پشاور، 16مئی (اے پی پی): خیبر پختونخوا کے وزیر برائے اعلیٰ تعلیم مینا خان افریدی نے کہا ہے کہ موجودہ خیبر پختونخوا حکومت کا جہاں تعلیم، صحت، امن و امان کو برقرار رکھنے، ریونیو بڑھانے اور دیگر شعبوں میں بہتری اور اصلاحات لانے کا منصوبہ ہے وہاں کھیلوں کی سرگرمیوں اور فروغ بھی شروع دن سے ترجیحات میں شامل رہا ہے اور یہ صرف الفاظ کی حد تک محدود نہیں ہے بلکہ اس کے لیے عملی اقدامات اٹھائے جارہے ہیں۔
صوبائی وزیر مینا خان گورنمنٹ گرلز سٹی گلبہار کالج میں انٹر زونل صوبائی گرلز سپورٹس مقابلوں کی تقریب تقسیم انعامات کے موقع پر شرکاء سے خطاب کر رہے تھے۔ انہوں نے کہا کہ نصابی سرگرمیوں کے ساتھ ساتھ کھیلوں کی سرگرمیوں کا انعقاد نہایت ضروری ہے، کھیلوں سے انسان کے اندر حالات کا مقابلہ کرنے کا مادہ پیدا ہوتا ہے اور انسان کے اعصاب کو مضبوط کرتا ہے۔خیبر پختونخوا میں ٹیلنٹ کی کوئی کمی نہیں بس ان پلیئرز کو پالش اور توجہ دینے کی ضرورت ہے خیبر پختونخوا میں کھیلوں کے فروغ پر خصوصی توجہ دینے کی بدولت اج قومی کرکٹ ٹیم میں کے پی سے 7 کھلاڑی ٹیم کا حصہ ہیں۔
صوبائی وزیر محکمہ اعلی تعلیم کے زیر اہتمام انٹرزونل سپورٹس مقابلوں کے کامیاب انعقاد پر ڈپٹی ڈائریکٹر سپورٹس اور منتظمین کی کاوشوں کو سراہا۔ انہوں نے طالب علموں کو مخاطب کرتے ہوئے کہا کہ زندگی میں مشکلیں آتی رہتی ہیں لیکن آپ نے ہار نہیں ماننا زندگی میں آگے بڑھنے کے لیے مسلسل کوشش کرنا ہوگی۔ انہوں نے کہا کہ شروع دن سے ہمارا ویژن رہا ہے کہ تعلیمی اداروں میں معیاری تعلیم فراہم کی جاسکے اور ایسی پالیسی بنائی جائے جو طالب علموں کے مفاد میں ہو۔
انہوں نے کہا کہ انٹرمیڈیٹ لیول پر جتنی یتیم بچیاں ہیں ان کو مفت تعلیم فراہم کرنے کے لیے پوری کوشش کریں گے تاکہ ہماری بچیاں بین الاقوامی فورم پر تعلیمی میدان میں مقابلہ کریں اور وہ دن دور نہیں جب یہ بچیاں بھی ہر سٹیج پر مقابلہ کریں گی۔
تقریب کے اختتام پر صوبائی وزیر نے انٹر زونل گرلز سپورٹس مقابلوں میں پہلی، دوسری اور تیسری پوزیشن لینے والی ٹیموں کے کپتان اور دیگر کھلاڑیوں میں ٹرافیاں کیش پرائزز اور سرٹیفیکیٹس تقسیم کیے۔
اس موقع پر ڈائریکٹر ہائیر ایجوکیشن فرید اللہ شاہ، ایڈیشنل ڈائریکٹرز، ڈپٹی ڈائریکٹر سپورٹس اعلیٰ تعلیم محمد عمران، کالج پرنسپل پروفیسر رابعہ سکندر اور طالبات نے کثیر تعداد میں شرکت کی۔
