پشاور، یکم مئی(اے پی پی): الخدمت فاونڈیشن کے تحت پشاور کے مختلف علاقوں سے تعلق رکھنے والے 15 بےروزگار خاندانوں کو باعزت روزگار کی فراہمی کیلئے ہتھ ریڑھیاں اور ہر محنت کش کو چھوٹے کاروبار کیلئے 55ہزار روپے مالیت کا مالی سپورٹ فراہم کردیا گیا جس کے زریعے مذکورہ افراد اپنے گھرانوں کی کفالت کیلئے اپنا کاروبار شروع کرسکیں گے۔
اس سلسلے میں جماعت اسلامی کے صوبائی ہیڈ کوارٹر المرکز الاسلامی سردار گڑھی جی ٹی روڈ پشاور میں الخدمت فاونڈیشن پشاور کےضلعی صدر ارباب عبدالحسیب کی زیرصدارت عالمی یوم مزدورکی مناسبت سے ایک پروقار تقریب کا انعقاد کیا گیا۔ اس موقع پر ممتاز عالم دین سابق چیف خطیب اور جماعت اسلامی کے صوبائی نائب امیر مولانا محمد اسماعیل مہمان خصوصی تھے۔
پشاور کے مختلف علاقوں سے تعلق رکھنے والے 15محنت کشوں کو سبزی، فروٹ،مشروبات،مچھلی، ڈرائی فروٹ ،کھانے پینے کے سٹالز اور دیگر چھوٹے اور باعزت روز گار کے آغاز ک کیلئے ہتھ ریڑھیاں اور مالی تعاون فراہم کیاگیا۔
اس موقع پرخطاب کرتے ہوئے مولانا محمد اسماعیل اور الخدمت فاونڈیشن کےصوبائی صدر خالدوقاص نے کہا کہ معاشرے کے پسے ہوئے نادار اور ضرورت مند طبقات کو معاشرے کےدرد دل رکھنے والے اہل خیر اور صاحب ثروت افراد اور فلاحی اداروں کے اشتراک سے الخدمت فاونڈیشن ملک بھر میں بھرپور ریلیف فراہمی کیلئے کوشاں ہے ۔
انہوں نے کہا کہ آج مزدوروں کا عالمی دن ہے اور اس دن کی مناسبت سے الخدمت فاونڈیشن نےفرضی یا وقتی سرگرمی کے بجائے 15افراد کو باعزت روزگار کیلئے وسائل فراہم کردئیے ہیں جو کہ دراصل 15 خاندانوں کوسپورٹ کرنا ہے ۔
انہوں نے بےروزگار محنت کشوں کو ہتھ ریڑھیاں اور روزگار کیلئے سبزی ،فروٹ اور دیگراجناس کے علاوہ نقد رقوم کی صورت میں مالی سپورٹ بھی فراہم کیا۔
تقریب میں الخدمت فاونڈیشن کے جماعت اسلامی کے صوبائی ڈپٹی جنرل سیکرٹری مولانا ہدایت اللہ،الخدمت پشاور کے جنرل سیکرٹری ملک پرویز خان الخدمت کے صوبائی سینئر پروگرام منیجر محمد وسیم اور صوبائی میڈیا منیجر نورالواحد جدون سمیت دیگر مقامی قائدین نے بھی شرکت کی۔
