لاہور 26 مئی(اے پی پی): وزیر خوراک بلال یاسین کی صدارت میں بیکری آئٹمز کی قیمتوں میں کمی کیلئے اہم اجلاس منعقد ہوا جس میں سیکرٹری خوراک پنجاب، ڈی جی فوڈ اتھارٹی، ڈی جی انڈسٹریز، ڈپٹی کمشنر لاہور شریک ہوئے۔
اجلاس میں بیکری ایسوسی ایشن اور 21 مشہور برینڈز کے نمائندوں نے شرکت کی۔
وزیر خوراک پنجاب نے کہا کہ ڈبل روٹی، رس اور بن کی قیمتوں میں خاطر خواہ کمی کی جائے کیونکہ 2 ماہ میں گندم، آٹے اور میدے کی قیمتوں میں 30 سے 48 فیصد تک کمی ہوئی، بلال یاسین نے کہا کہ روٹی اور نان کی قیمتوں میں کمی کروائی ہے اب بیکری مصنوعات کی قیمتیں بھی ہر صورت کم ہوں گی۔
صوبائی وزیر نے کہا کہ برینڈز نے قیمتوں میں کمی کیلئے سوموار تک مشاورت کا وقت مانگا ہے، اسٹیک ہولڈرز کو سوموار 27 مئی تک قیمتوں میں رضاکارانہ کمی کا وقت دیا گیا ہے، صوبائی وزیر نے کہا کہ بیکری مصنوعات اور بسکٹ برینڈز کی قیمتوں میں رضاکارانہ طور پر کمی کریں، صوبائی وزیر نے کہا کہ سوموار کو انتظامیہ کیساتھ بیٹھ کر بیکری آئٹمز کی قیمتوں میں کمی کا تعین ہوگا۔ پنجاب بھر میں انتظامیہ کم قیمتوں پر بیکری مصنوعات کی دستیابی یقینی بنائے گی، وزیر خوراک نے کہا کہ عوام تک سستی اور معیاری خوراک کی فراہمی کیلئے ہر ممکن اقدامات اٹھا رہے ہیں۔
