لاہور؛ 23 مئی(اے پی پی): وزیر بلدیات پنجاب ذیشان رفیق نے والڈ سٹی آف لاہور اتھارٹی کا دورہ کیا۔ڈائریکٹر جنرل ڈبلیو سی ایل اے کامران لاشاری نے صوبائی وزیر کو بریفنگ دی۔
ذیشان رفیق نے گفتگو کرتے ہوئے کہا کہ قدیم لاہور کے تاریخی ورثے کی حفاظت بہت ضروری ہے، مشہور وی بلاگرز کو اندرون شہر کے تاریخی مقامات پر جانے کی دعوت دیں، انھوں نے کہا کہ لاہور کے تاریخی ورثے کی بحالی کے چار پیکیج جاری ہیں، وزیراعلیٰ نے والڈ سٹی اتھارٹی کو مزید فعال کرنے کی ہدایت کی ہے۔
وزیر بلدیات نے کہا کہ والڈ سٹی کے اندر اور دروازوں کے پاس تجاوزات کا خاتمہ کیا جائے، انھوں نے کہا کہ اتھارٹی اندرون شہر صفائی کا کام اچھے انداز میں کر رہی ہے، اندرون شہر میں غیر ضروری کھمبے اور تار ہٹائے جا رہے ہیں،۔
ذیشان رفیق نے کہا کہ ملکی، غیرملکی سیاحوں کو زیادہ سے زیادہ سہولیات فراہم کریں۔صوبائی وزیر نے کہا کہ قلعہ لاہور کی بحالی کا بڑا منصوبہ فرانس کی مدد سے مکمل ہو رہا ہے، حضوری باغ کی تزئین و آرائش کو یقینی بنایا جا رہا ہے، ڈی جی والڈ سٹی نے بتایا کہ مسجد وزیر خان کے آس پاس دکانوں کو متبادل جگہ دی گئی، قدیم لاہور کی بحالی کے لئے جو کام کیا وہ انٹرنیشنل ماڈل ہے، ڈی جی والڈ سٹی نے کہا کہ قدیم عمارتوں کو بحال کرنے کا کام مرحلہ وار کیا جا رہا ہے، عالمی سطح پر قدیم ورثے کی حفاظت کے کام کو سراہا جا رہا ہے۔
