سرگودھا، 03 مئی(اے پی پی) :نئے تعینات ہونے والے ڈی پی او ڈاکٹر اسد اعجاز ملہی نے اپنے عہدے کا چارج سنبھال لیا ہے۔چارج سنبھالتے ہی ضلع بھر کے ایس ڈی پی اوز اورایس ایچ اوز سے تعارفی میٹنگ کی۔میٹنگ میں ایس پیز،ایس ڈی پی اوز اور ضلع بھر کے ایس ایچ اوز نے شرکت کی۔
ڈی پی او سرگودھا ڈاکٹر اسد اعجاز ملہی نے کہا کہ شہریوں کی جان و مال کا تحفظ پولیس کی اولین ذمہ داری ہے اور اس ذمہ داری کو پورا کرنے کے لیے ہر لمحہ کوشاں رہیں،جرائم پیشہ عناصر کے خلاف سخت قانونی کاروائی عمل میں لائی جائے،گشت کے نظام کو مزید موثر بنائیں تاکہ معاشرہ میں امن و امان کی فضا کو برقرار رکھا جائے،تمام زیر تفتیش مقدمات کو میرٹ پر یکسو کریں اور تمام درخواستوں پرمقررہ وقت میں کارروائی عمل میں لائیں۔ انہوں نے کہا کہ خواتین اور بچوں سے متعلق شکایات پر فوری ریسپانڈ کیا جائے،شہریوں کے ساتھ خوش اخلاقی سے پیش آئیں،تھانہ میں آنے والے شہریوں کی دادرسی کو یقینی بنایا جائے اور کہا کہ پکار 15 پر موصول ہونیوالی اطلاع پر متعلقہ ایس ایچ او خود موقع پر جائے گا اور کرائم کی اطلاع پر دئیے گئے ٹائم فریم کے اندر اندر ایف آئی آر کا اندراج یقینی بنایا جائے گا،اشتہاری مجرمان کی گرفتاری اور اندراج کےمتعلق کاروائی کو یقینی بنایا جائے،کرپشن کی شکایت پر زیرو ٹالرنس پالیسی کو اپنایا جائے گا اور کہا کہ منشیات فروشوں، آئس ڈیلررز، بدمعاشوں، رسہ گیروں کے خلاف گھیرا تنگ کیا جائے۔
