لاہور، 22 مئی (اے پی پی): وزیراعلیٰ پنجاب مریم نواز نے صوبے میں جیل ریفارمز کا جامع پلان طلب کرلیا ہے۔
وزیراعلیٰ پنجاب مریم نواز کی زیر صدارت جیل ریفارمز سے متعلق اجلاس ہوا جس میں فیصل آباد اور راولپنڈی میں ویمن جیلوں کے قیام کی منظوری دی گئی۔ اجلاس میں وزیراعلیٰ مریم نواز نے نئی جیلوں کو شہر سے باہر قائم کرنےکی ہدایت کی جب کہ پنجاب کے بخشی خانوں اورلاک اپ کی ری ویمپنگ پراجیکٹ کی بھی منظوری دی گئی۔
اجلاس میں جیلوں سےجرائم پیشہ افراد کے ممکنہ بیرونی رابطوں پر اظہار تشویش کیا گیا اور جیلوں کی سائبر سکیورٹی کے انتظامات کو فول پروف بنانے کی ہدایت کی گئی۔
سینئر صوبائی وزیر مریم اورنگزیب، صوبائی وزیر اطلاعات و ثقافت عظمیٰ زاہد بخاری، ایم پی اے ثانیہ عاشق، چیف سیکرٹری زاہد اختر زمان، ہوم سیکرٹری نورالامین مینگل، آئی جی جیل خانہ جات فاروق نذیر اور دیگر کی نے اجلاس میں شرکت کی۔
