لاہور،07مئی(اے پی پی):وفاقی وزیرداخلہ محسن نقوی نے اووربلنگ اوربجلی چوری روکنے کیلئے کریک ڈاؤن تیز کرنے کی ہدایت کرتے ہوئے کہا ہے کہ اووربلنگ کے ذریعے شہریوں پر بوجھ ڈالنے والے افسران کے خلاف بلا امتیاز کارروائی جاری رکھی جائے، اووربلنگ پر زیرو ٹالرنس پالیسی جاری رہیگی۔
ان خیالات کا اظہار وفاقی وزیرداخلہ محسن نقوی نے منگل کو یہاں ایف آئی اے لاہور زونل آفس میں اجلاس کی صدارت کرتے ہوئے کیا۔اجلاس میں اوور بلنگ اور بجلی چوروں کے خلاف کارروائی پر پیش رفت کاجائزہ لیا گیا۔ وفاقی وزیرداخلہ محسن نقوی نے گزشتہ دورے کے دوران دی گئی ہدایات پر پیش رفت کا جائزہ لیا جبکہ ڈائریکٹر ایف آئی اے لاہور سرفراز ورک نے اس متعلق اجلاس کو بریفنگ دی۔
اس موقع پر وفاقی وزیرداخلہ محسن نقوی نے کہا کہ ڈسکوز کی نااہلی اور غفلت کی سزا شہریوں کو دینا قطعاً قبول نہیں، بجلی صارفین کو اوور بلنگ میں ریلیف دینا ترجیح ہے۔ انہوں نے کہا کہ بجلی چوری میں ملوث سرکاری عملے کے خلاف بھی بلاتفریق ایکشن لیا جائے۔
اجلاس میں ڈی جی ایف آئی اے اسحاق جہانگیر ویڈیولنک کے ذریعے شریک ہوئے۔
