اسلام آباد ، 21 مئی (اے پی پی): وفاقی وزیر برائے منصوبہ بندی، ترقی اور خصوصی اقدامات احسن اقبال کی زیر صدارت وزیر اعظم کی جانب سے بنائی گئی کمیٹی برائے ترقیاتی فنڈز 25-2024 کا اجلاس منگل کو یہاں منعقد ہوا جس میں ترقیاتی بجٹ 25-2024 پر تفصیلی بریفنگ کے علاوہ وفاقی وزارتوں کی جانب سے مجموعی طور پر 2900 ارب روپے کے ترقیاتی بجٹ کی تجاویز بھی پیش کی گئیں۔
اجلاس کے دوران اپنے خیالات کا اظہار کرتے ہوئے وفاقی وزیر برائے منصوبہ بندی کا کہنا تھا کہ اگلے مالی سال کے دوران رواں منصوبوں کی تکمیل پہلی ترجیح ہوگی جبکہ دوسری ترجیح وزارتوں کے ترجیحاتی منصوبوں کو دی جائے گی۔ان کا کہنا تھا کہ ملک و قوم کی ترقی کا انحصار ترقیاتی بجٹ پر ہوتا ہے، اس سے قبل کسی بھی سیکٹر میں باقاعدہ سرمایہ کاری فراہم نہ کیے جانے کی وجہ سے ہی ہم بہت پیچھے رہ گئے ہیں۔
احسن اقبال نے کہا کہ آئی سی ٹی کے اسکولوں کو پورے ملک کے لیے پائلٹ ماڈل اسکولوں کے طور پر بنانا چاہئے۔ان کا مزید کہنا تھا کہ ملک کی مینجمنٹ سائیٹ میں پروفیشنل افراد کی کمی ہے،ہمیں منصوبوں کی کوالٹی کو بھی دیکھ کر ترجیحات مقرر کرنی ہیں۔
اجلاس میں ڈپٹی چیئرمین پلاننگ کمیشن محمد جہانزیب خان اورسیکرٹری منصوبہ بندی اویس منظور سمرا کے علاوہ وفاقی وزارتوں کے اعلی حکام نے بھی شرکت کی۔
