اسلام آباد، 14 مئی (اے پی پی ): وفاقی وزیرداخلہ و انسداد منشیات محسن نقوی کی ہدایت پر پاکستان کوسٹ گارڈز کا انسداد منشیات اور سمگلنگ کے خلاف کریک ڈاؤن،پاکستان کوسٹ گارڈز نے ساحلی پٹی پر خصوصی آپریشن کرتے ہوئے بھاری مقدار میں ممنوعہ اشیاء کو ضبط کر لیں، آپریشن کے دوران 12970 کلوگرا م سپاری ، 3049 پیکٹ گٹگا مکس، 1524 پیکٹ سگریٹ ، 1543 کلوگرام کپڑا مکس، 206 بنڈل نیٹ کا کپڑا قبضے میں لے لیا گیا۔آ پریشن کے دوران ڈیری و بیکری مصنوعات ،گروسری کی دیگر اشیاء، خشک میوہ جات، میک اپ کا سامان ، کوکنگ آئل،کراکری ، الیکٹرانک آلات، سپیڈ بوٹس اور مختلف گاڑیاں بھی ضبط کی گئیں جبکہ ضبط کی گئی اشیاء میں انجن آئل ،ایرانی پیٹرول اور ڈیزل بھی شامل تھا۔
اس حوالے سے وفاقی وزیرداخلہ و انسداد منشیات محسن نقوی نے کہا کہ منشیات اور سمگلنگ کی روک تھام کیلئے بلا امتیاز کارروائی جاری رکھی جائے۔ انہوں نے کہا کہ منشیات اور سمگلنگ کے خلاف زیرو ٹالرنس کی پالیسی پر عمل کیا جائے،سمگلنگ سے ملکی صنعت اور معیشت کو نقصان پہنچ رہا ہے، سمگلر مافیا کی سرکوبی ضروری ہے۔
وفاقی وزیرداخلہ و انسداد منشیات محسن نقوی نے کہا کہ منشیات کی خرید و فروخت کے خلاف ہر سطح پر کارروائی کی جائے، نئی نسل کو منشیات سے بچانا ہے۔
