نوشہرہ ورکاں،28 مئی ( اے پی پی): قیام پاکستان کے بعد پاکستان کا جوہری طاقت بننا سب سے بڑا اقدام ہے جس کا سہرا قائد میاں محمد نواز شریف کے سر سجتا ہے جو ان کی جرات مندانہ قیادت اور سیاسی بصیرت کا منہ بولتا ثبوت ہے ۔
ان خیالات کا اظہار پاکستان مسلم لیگ (ن) کے صدر اقبال صدیق سدھو، جنرل سیکرٹری شیخ عطاء اللہ، شاہد زیدی، میاں ظفر اللہ، یوتھ ونگ کے حاجی فیاض احمد، راجہ آزاد اور مسلم سٹوڈنٹس کے تحصیل صدر حسیب عارف سراء نے 28 مئی یوم تکبیر کے سلسلے میں منعقدہ تقریب سے خطاب کرتے ہوئے کیا۔ انہوں نے کہا کہ ایٹمی پاکستان در حقیقت امن کے قیام کا ضامن ہے جو خطے میں طاقت کا توازن قائم رکھنے کے لئے انتہائی ضروری تھا اس سے پاکستان پر بھارتی جارحیت کے اندیشوں کا خاتمہ ہوا ہے۔
انہوں نے کہا کہ یوم تکبیر پاکستان کی بقاء و سلامتی کی گارنٹی کا دن بھی ہے جسے کبھی فراموش نہیں کیا جا سکتا۔انہوں نے کہا کہ یوم تکبیر پاکستانی قوم ہی نہیں بلکہ عالم اسلام کیلئے بھی فخر کا دن ہے ،یوم تکبیر پیغام ہے کہ پاکستان کیخلاف جارحیت کا انجام عبرتناک ہو گا۔
