لاہور،22 مئی(اے پی پی): وزیر بلدیات ذیشان رفیق کی زیر صدارت پنجاب بھر کے میونسپل اداروں کے چیف آفیسرز کا اجلاس منعقد ہوا، جس میں پنجاب حکومت کی جانب سے قربانی کے جانوروں کے سیل پوائنٹس پر کوئی فیس نہ لینے کا فیصلہ کیا گیا۔
اجلاس میں بتایا گیا کہ وزیراعلی مریم نواز شریف نے بکرا عید پر زیرو ویسٹ یقینی بنانے کی ہدایت دی ہے۔سیکرٹری لوکل گورنمنٹ بورڈ نے بریفنگ میں بتایا کہ عیدالاضحی پلان کو حتمی شکل دے دی گئی ہے۔
وزیر بلدیات نے کہا کہ جانور سیل پوائنٹس “نو پرافٹ نو لاس” کی بنیاد پر قائم کئے جائیں گے، عیدالاضحی سے 10 روز قبل اور 3 روز بعد تک میونسپل ملازمین کی چھٹیوں پر پابندی عائد ہو گی۔
وزیر بلدیات نے کہا کہ شہروں میں قربانی والے ہر گھر میں ماحول دوست بیگز مفت فراہم کریں۔ انہوں نے کہا کہ مختلف شہروں میں جانور سیل پوائنٹس کے خود اچانک دورے کروں گا، وزیراعلی کی واضح ہدایات ہیں صفائی انتظامات پر سمجھوتہ نہیں ہوگا۔
وزیر بلدیات نے ہدایت دی کہ محکمہ بلدیات کے سنیئر افسر بھی فیلڈ کے دورے کریں، ڈیڈ لائن ختم ہونے کا انتظار کئے بغیر الائشیں ساتھ ساتھ ٹھکانے لگائی جائیں گی۔انہوں نے ہر بلدیہ سے عیدالاضحی کی حکمت عملی تحریری طور پر طلب کر لی-
انہوں نے کہا کہ سی اوز نمایاں مقامات اور سیل پوائنٹس پر اپنا موبائل نمبر آویزاں کریں گے اورسیکرٹری بلدیات آفس میں صوبائی مانیٹرنگ سیل قائم کیا جائے گا۔
ذیشان رفیق نے کہا کہ ہر علاقے کے منتخب نمائندوں کو بھی مانیٹرنگ عمل میں شامل کیا جائے، عید کی چھٹیوں میں صفائی میں کوتاہی برداشت نہیں کرونگا، انھوں نے کہا کہ میڈیا کی رپورٹنگ پر فوراً کارروائی کی جائے گی۔
