لاہور،2 مئی( اے پی پی ): وزیراعلیٰ پنجاب مریم نواز شریف نے کہا کہ پنجاب کومکمل طورپر پولیو فری بنانا ہمارا عزم ہے۔ ویکسی نیشن مہم کی ذاتی طورپر مانیٹرنگ کررہی ہوں۔اکتوبر2023سے اب تک پنجاب میں پولیو کیس رپورٹ نہیں ہوا ۔
وزیراعلیٰ پنجاب مریم نواز شریف کی زیر صدارت پولیو اورسائٹ بورڈ(Polio Oversight Board)کا اجلاس ہوا ، اجلاس میں پنجاب میں پولیو کے مکمل خاتمے کے لئے مشترکہ موثر کاوشوں پر اتفاق کیا گیا۔اجلاس میں پولیو کے خلاف مہم کو مزید موثر بنانے کے لئے اقدامات کاجائزہ لیا گیا اور پنجاب کو مکمل طورپر پولیو فری بنانے کے لئے تجاویز اور سفارشات کاجائزہ لیاگیا
اجلاس میں پنجاب میں دیگر علاقوں سے آنے والے بچوں کی ویکسی نیشن یقینی بنانے پر اتفاق کیا گیا اور پولیو کے مکمل خاتمے کے لئے ڈبلیو ایچ او اور دیگر اداروں کی طرف سے مکمل تعاون کی یقین دہانی کروائی گئی۔
اجلاس میں گفتگو کرتے ہوئے فوری ہنگامی رسپانس کے ذریعے ہی پولیو کو ختم کیا جاسکتا ہے۔ انہوں نے کہا کہ عوام کی صحت اورعلاج کی بہترین سہولتوں کی فراہمی پر پوری توجہ دے رہے ہیں۔انہوں نے کہا کہ دور دراز دیہات کے عوام کے لئے فیلڈ ہسپتال اور گنجان اربن ایریا کے لئے 200کلینک آن ویل پراجیکٹ شروع کئے گئے ہیں۔مہم کے دوران پولیو ورکرز کی سیفٹی او رسکیورٹی بھی یقینی بنائی جا رہی ہے۔ پولیو کے حوالے سے کمزور انڈیکٹر والے اضلاع پر بھرپور توجہ دی جارہی ہے۔ انہوں نے کہا کہ دیگر صوبوں سے آنے والے بچوں کی ویکسینیشن پر خصوصی کی ضرورت ہے۔
نمائندہ ڈبلیو ایچ او نے اس موقع پر کہا کہ انسداد پولیو کے لئے وزیراعظم محمد شہبازشریف کا عزم او رکاوشیں قابل تحسین ہیں۔
وزیر اعلیٰ پنجاب کو مختلف اضلاع میں جاری پولیو مہم پر بریفنگ کے دوران بتایا گیا کہ لاہور میں گزشتہ سات ماہ میں انسداد پولیو کے اہداف 85 فیصد تک حاصل کرلئے گئے ہیں۔پنجاب کے 10 اضلاع میں 29 اپریل سے انسداد پولیو مہم جاری ہے۔ افغان شہریوں کی پولیو امیونائزیشن کے لئے ٹرانزٹ پوانٹس پر کاونٹرز قائم کئے گئے ہیں۔
بریفنگ کے دوران بتایا گیا کہ پنجاب حکومت پولیو ٹیموں کو سکیورٹی سمیت دیگر سہولیات فراہم کر رہی ہے۔ورلڈ ہیلتھ آرگنائزیشن کی ریجنل ڈائریکٹرڈاکٹرحنان بلخی اور دیگر ماہرین نے تجاویز اور سفارشات پیش کیں ۔
سینیٹر پرویز رشید،صوبائی وزیر صحت خواجہ عمران نذیر، ڈاکٹر عدنان خان، ایم پی اے ثانیہ عاشق، چیف سیکرٹری، سیکرٹری صحت اور دیگر متعلقہ حکام بھی موجود تھے۔
