لاہور، 9 مئی(اے پی پی): محکمہ پرائمری اینڈ سیکنڈری ہیلتھ کئیر میں صوبائی وزراء صحت خواجہ عمران نذیر اور خواجہ سلمان رفیق کی زیر صدارت پنجاب ہیلتھ ریفارمز پروگرام کا جائزہ اجلاس منعقد ہوا، تمام ہیلتھ پراجیکٹس پر پیش رفت سے صوبائی وزراءصحت کو آگاہ کیا گیا ۔
صوبائی وزیر صحت خواجہ عمران نذیر نے اظہار خیال کرتے ہوئے کہا کہ وزیر اعلی پنجاب کی ہدایت ہے کہ فیلڈ ہسپتال، کلینکس آن ویلز کی مسلسل مانیٹرنگ کی جائے۔ 2500 بنیادی مراکز صحت، 300 رورل ہیلتھ سنٹرز کی ریوپمنگ کی رفتار تیز کی جائے۔انہوں نے کہا کہ ہیپاٹائیٹس، ٹی بی کلینکس کی بہتری کے لئے ڈاکٹرز کی جلد بھرتی کرکے مطلوبہ وسائل فراہم کئے جائیں گے۔
خواجہ عمران نذیر نے کہا کہ لیڈی ہیلتھ ورکرز، لیڈی ہیلتھ وزیٹرز، لیڈی ہیلتھ سپروائزرز کا ورٹیکل پروگرامز کی کامیابی میں بنیادی کردار ہے اس لیے لیڈی ہیلتھ ورکرز، وزیٹرز، سپروائزرز کی ٹریننگ پر خصوصی توجہ دی جارہی ہے۔انہوں نے کہا کہ پنجاب ہیلتھ ریفارمز پروگرام پر پیش رفت، نتائج کا ہر ہفتہ جائزہ لیا جائے گا ۔
صوبائی وزیر صحت خواجہ سلمان رفیق نے کہا کہ کلینکس آن ویلز، ادویات عوام کے گھروں میں فراہمی کا عمل تیز کردیا گیا ہے۔ وزیر اعلی پنجاب مریم نواز شریف صحت کے تمام منصوبوں کی جلد تکمیل کے لئے پر عزم ہے۔
سیکرٹری صحت علی جان خان نے پنجاب ہیلتھ ریفارمز پروگرام کی پیش رفت سے متعلق اجلاس کو بریفنگ دی ۔
