پشاور، 16 مئی(اے پی پی): گورنر خیبرپختونخوا فیصل کریم کنڈی سے ڈپٹی اسپیکر سندھ اسمبلی اینتھنی نوید کی گورنر ہاؤس میں ملاقات ہوئی، اس ملاقات میں بشپ آف پاکستان ہمفرے سرفراز پیٹر بھی شامل تھے ۔
ڈپٹی سپیکر اور بشپ سرفراز پیٹر نے فیصل کریم کنڈی کو گورنر کا عہدہ سنبھالنے پر مبارکباد دی، گلدستہ پیش کیا۔گورنر نے مبارکباد کیلئے تشریف لانے پر ڈپٹی سپیکر سندھ اسمبلی اینتھنی نوید اور بشپ سرفراز پیٹر کا شکریہ ادا کیا اور صوبے میں اقلیتوں کو درپیش مسائل کے حل کیلئے ترجیحی بنیادوں پر کردار ادا کرنے اور تعاون کی یقین دہانی کرائی۔
گورنر نے ملکی ترقی و خوشحالی میں اقلیتی برادری کے کردار کو سراہتے ہوئے خیبر پختونخوا میں تمام اقلیتوں بالخصوص مسیحی برادری کی شعبہ تعلیم سمیت تمام شعبوں میں خدمات قابل تحسین قرار دیا۔
