مری، 12 جون(اے پی پی): وزیر اعلی پنجاب کی ہدایت پر صوبائی وزیر پرائمری اینڈ سیکنڈری ہیلتھ کیئر خواجہ عمران نذیر نے تحصیل ہیڈکوارٹر ہسپتال مری کا دورہ کیا۔ خواجہ عمران نذیر نے اس موقع پر ٹی ایچ کیو ہسپتال میں ایوننگ شفٹ میں او پی ڈی شروع کرنے کا اعلان کیا۔ صوبائی وزیر صحت ٹی ایچ کیو ہسپتال مری کے بچہ، نرسری، ایمرجنسی، میڈیکل وارڈز میں گئے، مریضوں سے علاج معالجہ سے متعلق دریافت کیا اور ہسپتال میں صفائی کے انتظامات، فارمیسی، آپریشن تھیٹر کا بھی معائنہ کیا۔ سی ای او ہیلتھ راولپنڈی ڈاکٹر اعجاز گلو، ایم ایس ڈاکٹر نیاز علی نے صوبائی وزیر صحت کو ہسپتال میں دستیاب طبی سہولیات سے آگاہ کیا۔ ایم ایس نے صوبائی وزیر صحت کو ڈاکٹرز کے رہائش کے مسائل سے آگاہ کیا۔ صوبائی وزیر نے کہا کہ سی ای او ہیلتھ، ایم ایس ملکر ڈاکٹرز کے رہائش کے حوالہ سے ایک سکیم تیار کریں، ڈاکٹرز سمیت دیگر عملہ کے رہائشی مسائل ترجیحی بنیادوں پر حل کئے جائیں گے، خواجہ عمران نذیر نے کہا کہ شہریوں کی سہولت کے لئے ہسپتال کی توسیع کی جائیگی، ملحقہ پلاٹ بھی ہسپتال کا حصہ بنایا جائیگا۔
