کوئٹہ، 28 جون(اے پی پی): وزیر اعلیٰ بلوچستان میر سرفراز بگٹی ٹرین کی زد سے بچے کی جان بچاتے ہوئے زخمی ہونے والے اسکول ٹیچر عامر غوری کی عیادت کے لئے سول اسپتال ٹراما سینٹر پہنچ گئے ،ٹرین کی زد سے بچے کو نکالتے ہوئے اسکول ٹیچر کی ایک ٹانگ اور ایک بازو کٹ گیا تھا۔وزیر اعلیٰ نے عامر غوری کی بہادری اور انسانیت دوستی پر زبردست خراج تحسین پیش کیا اور کہاآپ نے بہادری کی نئی مثال قائم کرکے بلوچستان کا سر فخر سے بلند کر دیا۔ وزیر اعلیٰ بلوچستان کا کہنا تھا کہ بہادر سپوت کا علاج آغا خان اسپتال میں کرایا جائے گا، اور بچوں کے تمام تعلیمی اخراجات صوبائی حکومت برداشت کرے گی اور انہوں نے عامر غوری کی زوجہ کو سرکاری ملازمت دینے کا اعلان کیا اور کہا عامر غوری جیسے انسان دوست مسیحا ہمارے معاشرے کا روشن چہرہ ہیں دریں اثناء میر سرفراز بگٹی نے زخمی اسکول ٹیچر عامر غوری کے اہل خانہ سے ملاقات کی، بچوں کو پیار کیا اور والد کی بہادری کو سراہا۔
