لاہور،04جون (اے پی پی ): وزیر اعلیٰ پنجاب مریم نواز شریف کسانوں کی خوشحالی کے لیے پرعزم کسان کارڈ کے تاریخ ساز پیکج کے تحت کاشتکاروں کی رجسٹریشن کا عمل شروع کر دیا گیا ۔ کاشتکاروں کی رجسٹریشن کا آغاز وزیر زراعت پنجاب سید عاشق حسین کرمانی نے ایگریکلچر ہاؤس لاہور میں منعقدہ ایک تقریب میں کیاتقریب میں کاشتکاروں کی کثیر تعداد نے شرکت کی۔
اس موقع پر محکمہ زراعت پنجاب، بینک آف پنجاب، پلاننگ اینڈ ڈویلپمنٹ بورڈ، نادرا ، پنجاب ڈیزاسٹر مینجمنٹ اتھارٹی، پنجاب انفارمیشن ٹیکنالوجی بورڈ، پنجاب لینڈ ریکارڈ اتھارٹی اور زرعی آلات، مشینری بنانے والی فرمز اوردیگر سٹیک ہولڈرز نے شرکت کی۔
تقریب سے خطاب کرتے ہوئے وزیر زراعت پنجاب نے کہا کہ ٹرانسفارمنگ پنجاب ایگریکلچر پروگرام کا ساز پیکج صوبہ میں زرعی ترقی کے لیے ایک گیم چینجر ثابت ہوگا۔حکومت پنجاب کی اولین ترجیح زرعی ترقی اور کاشتکاروں کی خوشحالی ہے۔
انہوں نے کہا کہ وزیر اعلیٰ پنجاب کسان کارڈ کے لیے اب تک آن لائن 10 ہزار سے زائد درخواستیں موصول ہو چکی ہیں۔ کسان کارڈ سے 80 فیصد سے زائد چھوٹے کاشتکار مستفید ہوں گے وزیر اعلیٰ پنجاب کسان کارڈ کے ذریعے کاشتکاروں کو مڈل مین کے استحصال سے نجات ملے گی۔ 1 تا 12.5 ایکڑ زرعی اراضی کے مالک کاشتکار اس سکیم کے لیے اہل ہوں گے ۔
سید عاشق حسین کرمانی نے کہا کہ 300 ارب روپے کی خطیر رقم سے یہ منصوبہ محکمہ زراعت اور بینک آف پنجاب کے باہمی اشتراک سے شروع کیا گیا ہے۔ مستقبل میں وزیر اعلیٰ پنجاب کسان کارڈ کا دائرہ کار اور فنڈنگ کو مزید بڑھایا جائے گا۔ اس سکیم سے ڈیڑھ لاکھ روپے تک فی کسان بلا سود زرعی قرضہ حاصل کر سکیں گے۔ اس منصوبہ سے 5 لاکھ کاشتکار مستفید ہوں گے۔
