پشاور، 26جون(اے پی پی): گورنر خیبرپختونخوا فیصل کریم کنڈی سے وویمن چیمبر آف کامرس اینڈ انڈسٹری پشاور کے نمائندہ وفد نے بدھ کو یہاں گورنر ہاؤس میں ملاقات کی۔ ملاقات میں کاروباری شعبہ سے وابستہ خواتین کو درپیش مسائل و مشکلات پر تبادلہ خیال کیا گیا اور صوبے میں کاروباری اور صنعتی سرگرمیوں کے فروغ کے لیے خواتین انٹرپرینورز کے مواقع سے متعلق بھی گفتگو کی گئی۔
گورنر فیصل کریم کنڈی نے کہا کہ کاروباری شعبہ سے وابستہ، تعلیم یافتہ و ہنرمند خواتین کی حوصلہ افزائی کی جائے گی اور انہیں خودمختار بنانے کے لیے کاروباری مواقع فراہم کرنے کی ضرورت ہے۔انہوں نے کہا کہ وویمن چیمبر کا خواتین کو کاروباری شعبہ میں آگے لانے میں اہم کردار ہے اور خواتین کا کاروباری و تجارتی شعبہ میں اپنی صلاحیتوں کا استعمال حوصلہ افزا پیش رفت ہے۔
فیصل کریم کنڈی نے یقین دہانی کرائی کہ صوبے میں خواتین سرمایہ کاروں کو تجارتی سرگرمیوں کے لیے مکمل تعاون فراہم کیا جائے گا۔انہوں نے مزید کہا کہ ہمارے صوبہ کی خواتین قابلیت و صلاحیت میں کسی سے کم نہیں ہیں۔
نائب صدر وویمن چیمبر انیلہ خالد نے خواتین کو کاروباری شعبہ میں تعاون کی یقین دہانی پر گورنر کا شکریہ ادا کیا۔وفد نے گورنر کو چیمبر کے لیے اراضی، دوسرے صوبوں کے ساتھ روابط اور غیر ملکی ڈونرز کے ساتھ خواتین کے لیے ترقیاتی منصوبوں کے آغاز پر تعاون کی درخواست کی۔
وفد میں جنرل سیکرٹری صائمہ محبوب، زارا امتیاز، تجلہ خالد، عذرا نورین، ثمینہ احمد، نفیسہ بانو و دیگر خواتین چیمبر کی عہدیداران شامل تھیں۔
