اسلام آباد،12جولائی(اے پی پی):اسپیکر قومی اسمبلی سردار ایاز صادق نے کہا کہ پاکستان کے ہنگری کے ساتھ دیرینہ دوستانہ تعلقات ہیں ۔
ان خیالات کا اظہار انہوں نےہنگری کے سفیر بیلا فیزیکاس سے بروز جمعہ پارلیمنٹ ہاؤس میں ملاقات کے دوران کیا۔ملاقات میں دو طرفہ تعلقات ، پارلیمانی تعاون پر تبادلہ خیال کیا گیا۔
اسپیکر سردار ایاز صادق نے کہا کہ پاکستان،ہنگری سمیت تمام دوست ممالک کے ساتھ باہمی تعلقات کو مزید وسعت دینے کا خواہاں ہے،پارلیمانی سفارتکاری کے ذریعے دونوں ممالک کے عوام کو مزید قریب لایا جا سکتا ہے۔
اسپیکر قومی اسمبلی نے کہا کہ پارلیمانی وفود کے تبادلے اور پاک-ہنگری پارلیمانی فرینڈشپ گروپ کے ذریعے باہمی تعاون کو فروغ ملے گا ۔انہوں نے تعلیم کے میدان میں ہنگری کے تعاون کو سراہا۔
ہنگری کےسفیر نے اسپیکر کے ہنگری کے لیے خیر سگالی اور تعلقات کو مزید وسعت دینے کی خواہش پر اظہار تشکر کیا۔انہوں نے بھی پاکستان کے ساتھ اپنے تعلقات اور تعاون کو مزید وسعت دینے کی خواہش کا اظہار کیا۔سفیر نے ہنگری کے سپیکر کی طرف سے اسپیکر قومی اسمبلی کو پارلیمانی وفد کے ہمراہ دورے کا دعوت نامہ بھی دیا۔
