لاہور،22جولائی(اے پی پی): وزیراعلیٰ پنجاب مریم نواز شریف سے چیئرپرسن چیف منسٹر ڈائریکٹوریٹ آف ایویلیوایشن، فیڈ بیک، انسپیکشن اینڈ مانیٹرنگ بریگیڈیئر (ر) بابر علاؤالدین نے پیر کو یہاں ملاقات کی ۔ وزیر اعلیٰ مریم نواز شریف نے بریگیڈیئر (ر) بابر علاؤالدین کو عہدہ سنبھالنے پرنیک خواہشات کا اظہار کیا۔
ملاقات میں انتظامی سطح پر گورننس، شفافیت کے لئے تجاویز اور سفارشات پرتبادلہ خیال کیا اورحکومتی فیصلوں اور پالیسی سازی میں عوامی رائے کو شامل کرنے کے طریقہ کار پر بھی گفتگو کی گئی۔
ملاقات میں وزیر اعلیٰ پنجاب نے پبلک سروس سے متعلقہ سرکاری محکموں کی مانیٹرنگ بہتر بنانے کے لیے ٹیکنالوجی پر انحصار بڑھانے کی ہدایت کی اور کہا کہ کی پرفارمنس انڈیکس کے قیام سے افسران میں احساس ذمہ داری کا اضافہ ہوا ہے، پرفارمنس انڈیکس کی سخت مانیٹرنگ کی جائے،گڈ گورننس یقینی بنانے کے لئے ڈیفم کردار نہایت اہم ہے۔
سینیٹر پرویز رشید،سینئر صوبائی وزیر مریم اورنگزیب اور دیگر بھی اس موقع پر موجود تھے۔
