لاہور، 22 فروری (اے پی پی): وزیراعلیٰ پنجاب مریم نواز نے صوبے میں ‘‘مریم نواز کمیونٹی ہیلتھ سروسز ’’ متعارف کروانے کا فیصلہ کرلیا، آؤٹ سروسز کے ذریعے 20 ہزار ہیلتھ انسپکٹرز کی خدمات لی جائیں گی جبکہ 39 ہزار لیڈی ہیلتھ ورکرز کو بھی اسی سروس سے منسلک کیا جائے گا۔
وزیراعلیٰ پنجاب مریم نواز نے ہیلتھ سیکٹر کی بہتری کیلئے اہم قدم اٹھالیا، پنجاب میں ‘‘مریم نواز کمیونٹی ہیلتھ سروسز ’’ متعارف کروانے کا فیصلہ کیا ہے، مریم نواز کمیونٹی ہیلتھ سروسز، صحت کے 19 ٹاسک پورے کرے گی۔
رپورٹ کے مطابق آؤٹ سروسنگ کے ذریعے مزید 20 ہزار ہیلتھ انسپکٹرز کی خدمات لی جائیں گی، لیڈی ہیلتھ ورکرز پروگرام کو بھی ‘‘مریم نواز کمیونٹی ہیلتھ سروسز ’’ سے منسلک کیا جائے گا جبکہ 39 ہزار لیڈی ہیلتھ ورکر ’’مریم نواز کمیونٹی ہیلتھ سروسز‘‘ فورس کا حصہ ہوں گی۔
تفصیلات کے مطابق ورک فورس مجموعی طور پر تقریباً 60 ہزار سے زائد ملازمین پر مشتمل ہوگی، ‘‘مریم نواز کمیونٹی ہیلتھ سروسز ’’ پولیو سمیت دیگر ویکسی نیشن کی ذمہ دار ہوگی، مریم نواز کمیونٹی ہیلتھ سروسز کے ذریعے مریضوں کا مستند ریکارڈ مرتب کیا جائے گا، مریم نواز کمیونٹی ہیلتھ سروسز سے میپنگ کا ٹاسک بھی پورا کیا جائے گا۔
اجلاس میں بریفنگ میں بتایا گیا کہ 93 فیصد مریض ہیلتھ سروسز سے متعلق اصلاحات سے مطمئن ہیں۔ وزیراعلیٰ پنجاب مریم نواز نے کمیونٹی ہیلتھ سروسز سے متعلق جامع پلان طلب کرلیا اور اسے فعال کرنے کیلئے فوری اقدامات کا حکم بھی دیدیا۔
