لاہور، 25 اپریل (اے پی پی): صوبائی وزیر صنعت و تجارت چوہدری شافع حسین سے چیئرمین آل پاکستان ٹیکسٹائل ملز ایسوسی ایشن کامران ارشد کی قیادت میں وفد نے ملاقات کی۔ پیسک ہاؤس میں ہونے والی ملاقات میں ٹیکسٹائل سیکٹر کو درپیش مسائل ، گارمنٹ سٹی اور برآمدات میں اضافے سے متعلق امور پر بات چیت کی گئی۔
وفد نے سندھ میں گڈز ٹرانسپورٹرز کی طویل ہڑتال اور ٹیکس سکیم سے متعلقہ مسائل سے آگاہ کیا ۔ صوبائی وزیر صنعت و تجارت چوہدری شافع حسین نے کہا کہ ٹیکسٹائل سیکٹر کو قومی معیشت میں ریڑھ کی ہڈی کی حیثیت حاصل ہے۔ ٹیکسٹائل سیکٹر روزگار کی فراہمی اور برآمدات کا بڑا ذریعہ ہے۔
چوہدری شافع حسین نے کہا کہ حکومت ٹیکسٹائل سیکٹر کے فروغ کیلئے قائد اعظم بزنس پارک شیخوپورہ میں گارمنٹ سٹی بنارہی ہے۔ گارمنٹ سٹی میں مقامی اور غیر ملکی سرمایہ کار ٹیکسٹائل انڈسٹری لگائیں گے ۔ انھوں نے کہا کہ اپٹما گارمنٹ سٹی میں سرمایہ کاری کے سنہری مواقع سے فائدہ اٹھائے۔ انھوں نے کہا کہ اپٹما ٹیکسٹائل سیکٹر میں چین کے سرمایہ کاروں کے ساتھ جوائنٹ وینچر بھی کرسکتی ہے ۔
صوبائی وزیر نے کہا کہ حکومت ٹیکسٹائل سیکٹر کے خام مال کپاس کی پیداوار بڑھانے کیلئے سیڈ ڈویلپمنٹ پر سنجیدگی سے کام کررہی ہے ۔ صوبائی وزیر نے کہا کہ اپٹما چین میں ہونے والے تجارتی میلوں میں اپنی مصنوعات کی بھرپور نمائش کرے۔ ایسی نمائشوں میں شرکت کیلئے ٹریڈنگ ڈویلپمنٹ اتھارٹی آف پاکستان کا تعاون حاصل کیا جائے گا ۔ چوہدری شافع حسین نے کہا کہ پنجاب کی انڈسٹریل اسٹیٹس میں صنعتی انفراسٹرکچر کو مزید بہتر بنایا جا رہا ہے ۔ فیڈمک کے زیر اہتمام انڈسٹریل اسٹیٹ میں ریلوے اسٹیشن کے قیام کے لئے وفاقی حکومت سے بات کی گئی ہے۔ فیصل آباد میں ایکسپو سینٹر بھی بنایا جائے گا ۔ صوبائی وزیر نے کہا کہ صنعتی ترقی کے بغیر معشیت کی مضبوطی ممکن نہیں۔ حکومت نے صوبے میں صنعتکاری کے عمل کو تیز کرنے کے لئے سازگار ماحول کی فراہمی کو یقینی بنایا ہے۔
چئیرمین اپٹما نے کہا کہ پنجاب حکومت نے انڈسٹریلائزشن اور ٹیکسٹائل سیکٹر کے فروغ کیلئے بے مثال اقدامات کئے ہیں۔ چینی سرمایہ کاروں کے ساتھ ٹیکسٹائل سیکٹر میں جوائنٹ وینچر کیلئے بھی تیار ہیں۔ انھوں نے کہا کہ ٹی ڈیپ کے تعاون سے چین میں ہونے والے تجارتی میلوں میں بھرپور شرکت کریں گے۔ ٹیکسٹائل سیکٹر کے فروغ کیلئے حکومت کے ساتھ ساتھ مل کر آگے بڑھیں گے۔
چیئرمین پیڈمک جاوید اقبال ،ڈی جی پنجاب سرمایہ کاری بورڈ سہیل احمد اور دیگر متعلقہ افسران بھی ملاقات میں موجود تھے ۔ وفد میں سیکرٹری جنرل اپٹما نارتھ زون محمد رضا باقر، اسد، فیصل، ایس ایم نوید اور دیگر شامل تھے ۔
