لاہور 3 اپریل (اے پی پی): صوبائی وزیر صنعت و تجارت چوہدری شافع حسین نے کہا کہ دریائے سندھ سے نہریں نکالنے کا مسئلہ حل ہونا چاہے۔ ظہور پیلس گجرات میں میڈیا سے گفتگو کرتے ہوئے چوہدری شافع حسین نے کہا کہ سپیکر پنجاب اسمبلی نے اس مسئلے کے حل کیلئے ان کیمرہ اجلاس کی تجویز دی ہے، اُمید ہے اس مسئلہ کو جلد حل کر لیاجائیگا۔
صوبائی وزیر نے کہا کہ جب تک کالا باغ ڈیم پر اتفاق رائے نہیں ہو جاتا نہروں پر چھوٹے ڈیم بنانے چاہئیں۔ چھوٹے ڈیمزسے 30میگا واٹ تک بجلی بھی حاصل کی جا سکتی ہے ۔
چوہدری شافع حسین نے کہا کہ وفاقی حکومت دہشت گردی کے ناسور سے نمٹنے کیلئے سخت اقدامات کررہی ہے۔ ہمسایہ ممالک گوادر کی ترقی نہیں چاہتے اس لیے بلوچستان میں دہشت گردی کے واقعات میں اضافہ دیکھنے میں آرہا ہے۔ انھوں نے کہا کہ بلوچستان میں امن کیلئے چوہدری شجاعت حسین ماضی کی طرح اب بھی کردا ر ادا کر سکتے ہیں ۔
صوبائی وزیر نے کہا کہ ملک میں دہشت گردی کے خاتمہ کیلئے ہمسایہ ممالک کیساتھ بیٹھ کر بات کی جانی چاہئے۔ جعفر ایکسپریس اور دہشت گردی کے دیگر واقعات میں بے گناہ شہریوں اور سیکورٹی فورسز کے اہلکاروں کو شہید کرنیوالوں کا اسلام سے کوئی تعلق نہیں۔ صوبائی وزیر نے کہا کہ دہشت گردوں کا مقابلہ کرنے کیلئے عوام کو اکٹھا ہونا ہوگا۔
چوہدری شافع حسین نے کہا کہ سیاستدانوں کو اپنی جماعتوں سے بالاتر ہو کر ملک کیلئے سوچنا ہوگا۔ انھوں نے کہا کہ تحریک انصاف کو بھی دہشت گردی کی روک تھام کیلئے ہونیوالے اجلاس میں شرکت کرنی چاہیے۔ ہم چاہتے ہیں کہ پاکستان اُن دس ممالک میں شامل ہو جائے جہاں امن و امان کی صورتحال مثالی ہے۔
چوہدری شافع حسین نے کہا کہ حکومت کی درست معاشی پالیسیوں کے باعث ملک اقتصادی طور پر بہتری کی طرف جارہا ہے۔ تحریک انصاف کی جانب سے لانگ مارچ کے فیصلوں کے بعد دوبارہ اقتصادی معاملات میں رکاوٹیں آسکتی ہیں۔ البتہ مولانا فضل الرحمٰن کا تحریک انصاف کیساتھ چلنا مشکل نظر آرہا ہے۔
انھوں نے کہا کہ وزیراعظم شہباز شریف چاہتے ہیں کہ آئی ایم ایف کے قرضوں سے جان چھڑالی جائے تب ہی پاکستان ترقی کر سکتا ہے۔ چوہدری شافع حسین نے کہا کہ عوام کی بہتری کیلئے پنجاب حکومت دن رات محنت کر رہی ہے نئے پراجیکٹس لائے جارہے ہیں۔
