لاہور۔ 03 اپریل (اے پی پی): صوبائی وزیر صحت خواجہ سلمان رفیق نے جنرل ہسپتال لاہور اور پنجاب انسٹی ٹیوٹ آف نیوروسائنسز کا اچانک دورہ کیا۔
خواجہ سلمان رفیق نے او پی ڈی میں مریضوں سے ملاقات کی اور طبی سہولیات کا جائزہ لیا، ڈائریکٹر او پی ڈی کو کارکردگی بہتر کرنے کا آخری موقع دیا۔
صوبائی وزیر نے وزیر اعلیٰ کمپلینٹ سیل پر ایک اہل کار کو موبائل فون استعمال کرنے پر ہٹا دیا۔ خواجہ سلمان رفیق نے کہا کہ جنرل ہسپتال میں مریضوں کی آسانی کیلئے ریڈیالوجی ڈیپارٹمنٹ میں 4 مزید الٹراساؤنڈ مشینیں فراہم کر دی گئی ہیں۔
انھوں نے کہا کہ مریضوں کی آسانی کیلئے کیو مینجمنٹ سسٹم فعال کر دیا گیا ہے۔ پنز میں مریضوں کی قطاروں کے رش میں کمی کیلئے بھی کیو مینجمنٹ سسٹم کا نظام فعال کر رہے ہیں۔
خواجہ سلمان رفیق نے ایمرجنسی، وزیر اعلیٰ کمپلینٹ کاؤنٹر، نیورولوجی، پرچی کاؤنٹرز، میڈیسن سٹور و دیگر شعبہ جات کا بھی دورہ کیا۔
اس موقع پر پرنسپل پروفیسر سردار الفرید ظفر، ایم ایس جنرل ہسپتال ڈاکٹر فریاد اور ایم ایس پنز ڈاکٹر عمر اسحاق بھی پہنچ گئے۔ صوبائی وزیر نے کہا کہ سرکاری ہسپتالوں کےحالات مسلسل مانیٹرنگ سے بہتری کی طرف جا رہے ہیں۔
انھوں نے کہا کہ ایم ایس حضرات مریضوں کیلئے آسانیاں پیدا کریں اور ہسپتالوں میں ادویات کی فہرستیں اور ڈیوٹی روسٹرز ہر وارڈ میں آویزاں کریں۔
خواجہ سلمان رفیق نے کہا کہ سرکاری ہسپتالوں کے حالات بہتر کرنے کی پوری کوشش کی جا رہی ہے۔مریضوں کے علاج و معالجہ میں کوئی سمجھوتہ نہیں کیا جا رہا۔ ہسپتالوں کے وزٹس کا سلسلہ جاری رہے گا۔ ہسپتالوں کا دورہ کرکے مریضوں سے طبی سہولیات بارے براہِ راست فیڈ بیک لیا جا رہا ہے۔
