لاہور 10 اپریل (اے پی پی): صوبائی وزیر اوقاف ومذہبی امور چوہدری شافع حسین سے گجرات سے تعلق رکھنے والے علماء کرام کے وفد نے ملاقات کی۔ ملاقات میں محکمہ اوقاف کے امور اور علماء کرام کے مسائل پر بات چیت کی گئی۔ محکمہ اوقاف کے علماء کرام نے ڈسپیرٹی الاؤنس کا مطالبہ کیا۔ صوبائی وزیر اوقاف چوہدری شافع حسین نے کہا کہ محکمہ اوقاف کے زیر اہتمام مساجد اور مزارات کی تزئین آرائش کی جارہی ہے، محکمہ اوقاف کی زمینوں پر ناجائز قبضے ختم کراکے ان زمینوں پر صحت اور تعلیم کے ادارے بنائیں گے ۔ صوبائی وزیر نے بتایا کہ محکمہ اوقاف کی کمپیوٹرائزیشن کی جارہی ہے اور قرآن بورڈ میں نئے لوگوں کو شامل کیا جارہا ہے۔ چوہدری شافع حسین نے کہا کہ معاشی ترقی کیلئے امن ناگزیر ہے۔ علماء کرام قیام امن اور معاشرے میں اخوت اور رواداری کے جذبات کے فروغ کیلئے اپنا موثر کردار ادا کریں۔ چوہدری شافع حسین نے کہا کہ اسلام امن کا مذہب ہے اس میں دہشت گردی کی کوئی گنجائش نہیں۔ انہوں نے کہا کہ اتحاد کی قوت سے ہی دہشت گردی کے خلاف جنگ جیتی جاسکتی ہے۔ دہشت گردی کے خلاف جنگ میں ہر ایک کو اپنا کردار ادا کرنا ہے۔ صوبائی وزیر اوقاف نے علماء کرام کے مسائل کے حل کی یقین دہانی بھی کروائی۔
