ملتان 22 اپر یل(اے پی پی):ڈپٹی کمشنر محمد علی بخاری نے کہا ہے کہ ضلع ملتان میں 3 روزہ پولیو مہم کامیابی سے جاری ہے اس سلسلے میں پولیو مہم کے دوسرے روز کے اختتام پر 6 لاکھ 39 ہزار بچوں کو قطرے پلائے گئے ہیں۔
ان خیالات کا اظہار ڈپٹی کمشنر محمد علی بخاری نے شہر کے مختلف علاقوں کا اچانک دورہ کرتے ہوئے کیا۔ڈپٹی کمشنر نے فیلڈ پولیو ٹیموں کی انسپکشن کی اور بریفننگ لی۔محمد علی بخاری نے گھروں میں جاکر بچوں کو پلائی گئی ویکسینیشن کی انسپکشن کی۔
ڈپٹی کمشنر محمد علی بخاری نے کہا کہ 3 روزہ پولیو مہم کے دوران 10 لاکھ سے زائد بچوں کو قطرے پلائے جائیں گے۔پولیو مہم کے سلسلے میں عوامی مقامات اور جنرل بس سٹینڈ پر خصوصی کیمپ قائم کئے گئے ہیں محمد علی بخاری کا کہنا تھا کہ پولیو مہم کے دوران فیلڈ ٹیموں کی سیکورٹی کیلئے خصوصی اقدامات کئے گئے ہیں۔
