اسلام آباد،07 اپریل(اے پی پی): وزیراعظم کے معاونِ خصوصی برائے صنعت و پیداوار ہارون اختر خان کی زیر صدارت ایک اعلیٰ سطحی اجلاس منعقد ہوا، جس میں صنعتی ترقی، ہنر مندی، اور خواتین کو بااختیار بنانے کے حوالے سے اہم فیصلے کیے گئے۔
ہارون اختر خان نے اجلاس سے خطاب کرتے ہوئے کہا کہ تکنیکی اپ گریڈیشن اور ہنر مند افرادی قوت وقت کی اہم ضرورت ہے۔ انہوں نے کہا کہ وزیراعظم کا ویژن ہے کہ نوجوانوں کو ہنر مند بنا کر ملکی صنعتی ترقی کو فروغ دیا جائے۔
اجلاس میں ٹیکنالوجی اپگریڈیشن اینڈ اسکلز ڈویلپمنٹ کمپنی (ٹسديک) کی کارکردگی پر بھی بریفنگ دی گئی۔ بتایا گیا کہ اب تک 63,578 انجینئرز، طلباء اور نوجوان مختلف شعبوں میں تربیت حاصل کر چکے ہیں۔
ہارون اختر خان نے خواتین کے لیے کاروباری اور ڈیجیٹل مہارتوں کے مرکز کے قیام کا اعلان کرتے ہوئے کہا کہ خواتین معیشت میں کردار ادا کر کے پاکستان کی جی ڈی پی میں خاطر خواہ اضافہ کر سکتی ہیں۔
انہوں نے مقامی و عالمی سطح پر پاکستانی صنعتوں کی مسابقتی صلاحیت بڑھانے پر زور دیا اور کہا کہ وزیر اعظم کے ویژن کے مطابق ٹسديک کو صنعتی شعبوں میں بہتری کے لیے نئی ذمہ داریاں سونپی گئی ہیں۔
ہارون اختر خان نے کہا کہ ٹسديک صنعتی خدمات کی فراہمی میں کلیدی حیثیت رکھتا ہے اور اسے مزید فعال اور مؤثر بنانے کے لیے ہر ممکن اقدام اٹھایا جائے گا۔
