اسلام آباد، 25 اپریل (اے پی پی):وزیرِاعظم محمد شہباز شریف کی زیر صدارت پاکستان انٹرنیشنل ایئرلائنز (PIA) کی نجکاری پر جائزہ اجلاس منعقد ہوا جس میں وزیرِ اعظم کو نیلامی کے طریقہ کار،درکار مدت اور نیلامی میں شرکت کیلئے شرائط سے آگاہ کیا گیا۔
وزیرِاعظم نے پی آئی اے کی نجکاری میں شفافیت کو کلیدی اہمیت دینے کی ہدایت دی اور کہا کہ نجکاری مجوزہ معینہ مدت میں یقینی بنائی جائے۔
دوران اجلاس وزیرِ اعظم نے پی آئی اے کی نجکاری کیلئے روڈ شوز اور سرمایہ کاروں کو مکمل اعتماد میں لینے کی ہدایات دیں۔ انھوں نے کہا کہ نجکاری کے طریقہ کار میں شفافیت کو مرکزی اہمیت دی جائے۔شفافیت یقینی بنانے کے لئے، پی آئی اے سمیت آئندہ تمام سرکاری کمپنیوں کی نجکاری براہ راست ٹیلی ویژن اور ڈیجیٹل پلیٹ فارمز پر نشر کی جائے۔
