لاہور،29 اپریل ( اے پی پی): وفاقی وزیرداخلہ محسن نقوی نے جمعیت علمائے اسلام کے سربراہ مولانا فضل الرحمن سے ملاقات کی ہے، ملاقات میں باہمی دلچسپی کے امور،پاک بھارت کشیدگی اور فلسطین کے مسائل پر تبادلہ خیال کیا گیا۔
وفاقی وزیرداخلہ محسن نقوی نے بھارت کے غیر منطقی اور یکطرفہ اقدامات پر پاکستان کے اصولی موقف اور فیصلوں پر مولانا فضل الرحمن کو اعتماد میں لیا۔وفاقی وزیر نے مولانا فضل الرحمن کو نیشنل سکیورٹی کمیٹی کے فیصلوں کے بارے بھی آگاہ کیا۔
مولانا فضل الرحمٰن نے گفتگو کرتے ہوئے کہا کہ مودی مسلمان دشمن ہے۔ اسلام اور مسلمان کے مقابلے میں جہاں کوئی محاذ ملے گا مودی وہاں کھڑا ہو جائے گا۔انہوں نے کہا کہ بھارت آگ سے کھیلنے کی کوشش کر رہا ہے۔
محسن نقوی نے کہا کہ پاکستان کسی بھی مہم جوئی کا پوری قوت سے جواب دے گا۔ اس موقع پر وزیر داخلہ محسن نقوی نے مولانا فضل الرحمن کی خیریت دریافت کی اور ان کی صحت کےلئے نیک خواہشات کا اظہار کیا۔
