واشنگٹن ڈی سی، 24 اپریل (اے پی پی):وفاقی وزیرِ خزانہ و محصولات سینیٹر محمد اورنگزیب نے وولنریبل 20 (V20) وزارتی مکالمے میں “کلائمیٹ پراسپیریٹی کو ممکن بنانا” کے عنوان پر خطاب کیا۔
وزیرِ خزانہ نے پاکستان کے لیے کلائمیٹ فنانشل اسٹریٹجی کے آغاز کو اجاگر کیا۔انھوں نے مزید کہا کہ ملک ایک کلائمیٹ پراسپیریٹی پلان تیار کر رہا ہے اور عالمی مالیاتی فنڈ (آئی ایم ایف) کے ساتھ ریزیلینس اینڈ سسٹین ایبلٹی فسیلٹی (RSF) کے تحت ایک نئے انتظام پر اسٹاف لیول معاہدہ بھی کیا گیا ہے۔
وزیرِ خزانہ نے اس بات پر زور دیا کہ ورلڈ بینک کا پاکستان کے لیے منظور شدہ 10 سالہ کنٹری پارٹنرشپ پروگرام (سی پی ایف) کلائمیٹ ریزیلینس اور ڈیکاربنائزیشن کو اہم ستون کے طور پر شامل ہے۔
انھوں نے کہا کہ قابل سرمایہ کاری اور بنک ایبل منصوبوں کی ترقی کے لئے صلاحیت کی کمی ایک چیلنج ہے۔ انھوں نے بین الاقوامی مالیاتی نظام میں اصلاحات کی ضرورت پر زور دیا تاکہ وہ ممالک جو ماحولیاتی اثرات سے سب سے زیادہ متاثر ہیں، ان کی اقتصادی لچک، پائیداری اور خوشحالی کو یقینی بنایا جا سکے۔
