واشنگٹن، ڈی سی، 24 اپریل (اے پی پی ): وفاقی وزیر خزانہ و ریونیو، سینیٹر محمد اورنگزیب نے واشنگٹن میں متحدہ عرب امارات کے وزیر مملکت برائے مالی امور، جناب محمد بن ھادی الحسینی سے ملاقات کی۔
وزیر خزانہ نے متحدہ عرب امارات کے ہم منصب کو پاکستان کے معاشی اشاریوں، حالیہ فِچ کی طرف سے خودمختار کریڈٹ ریٹنگ میں بہتری، اور حکومت کے نجکاری کے ایجنڈے سے آگاہ کیا۔ انہوں نے بتایا کہ پاکستان نے آئی ایم ایف کے ایکسٹینڈڈ فنڈ فسیلٹی (EFF) کے تحت پہلے جائزے اور ریزیلینس اینڈ سسٹین ایبلیٹی فسیلٹی (RSF) کے تحت ایک نئے معاہدے پر اسٹاف لیول ایگریمنٹ (SLA) حاصل کر لیا ہے۔
انہوں نے حکومتی سطح (G2G) اور کاروباری سطح (B2B) پر متحدہ عرب امارات کے سرمایہ کاروں کی دلچسپی کو سراہا اور مفاہمتی یادداشتوں کو عملی معاہدوں میں بدلنے کی ضرورت پر زور دیا۔ انہوں نے کرپٹو کرنسی کے ضابطہ کار سے متعلق متحدہ عرب امارات کے تجربے سے فائدہ اٹھانے میں دلچسپی کا اظہار بھی کیا۔
وزیر خزانہ نے متحدہ عرب امارات کے وزیر مالیات کو پاکستان کے دورے کی دعوت دی۔
