لاہور، 11 اپریل (اے پی پی):متروکہ وقف املاک بورڈ کے زیر اہتمام گوردوارہ پنجہ صاحب اور گوردوارہ دربار صاحب کرتار پور میں وساکھی میلہ کی مناسبت سے تقریبات کا آغاز ہوگیا۔ بھارت سمیت دنیا بھر سے آئے سکھ یاتریوں نے مذہبی رسومات کے مطابق ارداس و خصوصی دعائیں کیں جبکہ مذہبی روایات کے مطابق لنگر کا اہتمام بھی کیا گیا ۔سکھ خواتین نےلنگر کی تیاری اور اہتمام کرنے میں مدد کی تو کسی نے برتن صاف کرنے سمیت دیگر امور انجام دیئے ۔
ترجمان متروکہ وقف املاک بورڈ کے مطابق بھارت سے آئے شرومنی گوردورارہ پر بندھک کمیٹی کے لیڈر رویندر سنگھ سرنا نے دورہ پاکستان کے موقع پر اظہار خیال کرتے ہوئے کہا ہے کہ بھارت سمیت دنیا بھر سے آنے والے سکھ پاکستان میں اپنے گوردوارہ صاحبان کے درشن کر کے بہت خوش ہیں ۔انہوں کہا کہ رہائش ،میڈیکل اور بہترین سفری سہولیات مہیا کرنے پر ہم حکومت پاکستان اور ٹرسٹ بورڈ انتظامیہ کے بے حد شکر گزار ہیں ۔دہلی گوردوارہ مینجمنٹ کمیٹی کے لیڈر سردار دلجیت سنگھ سرنا نے کہا کہ انتظامیہ نے گوردوارہ صاحبان میں یاتریوں کے لیے بہترین انتظامات کیے ہیں اگرچہ یاتری پہلے سے دوگنی تعداد میں ہیں اس کے باوجود پاکستان میں ہماری مہمان نوازی میں کوئی کمی نہیں ہے ۔حسن ابدال میں یاتریوں نے بابا ولی گندھاری کے مزار پر حاضری بھی دی ۔متروکہ وقف املاک بورڈ انتظامیہ کی جانب سے گوردوارہ پنجہ صاحب حسن ابدال کو رنگ برنگی خوبصورت روشنیوں سے سجایا گیا تھا ۔ضلعی انتظامیہ کی جانب سے گوردوارہ کے اطراف میں سیکورٹی کے سخت انتظامات کیے گئے۔
ترجمان بورڈ غلام محی الدین کے مطابق تعداد دگنا ہونے کے باعث تشکیل دیئے گئے سکھ یاتریوں کے دونوں گروپ سیکورٹی آفیسر عاصم چوہدری کی زیر نگرانی گوردوارہ پنجہ صاحب اور گور دوارہ دربار صاحب سے گودوارہ جنم استھان ننکانہ صاحب پہنچیں گے ۔ ضلعی انتظامیہ پولیس اور دیگر اداروں کی مدد سے یاتریوں کی سیکورٹی کو فول پروف بنایا گیا ہے ۔ تمام سیکورٹی پوانٹس پر جدیدید سیکنرز نصب کیے گیے ہیں واپڈا کی طرف سے گوردواروں میں بلا تعطل بجلی کی فراہمی یقینی بنائی جا رہی ہے۔
