اسلام آباد،21 مئی(اے پی پی): قازقستان کے سفیر یرژان کیستافین کی سی ڈی اے ہیڈکوارٹرز آمد،سفیر نے سی ڈی اے ہیڈکوارٹرز میں چیئرمین سی ڈی اے، چیف کمشنر اسلام آباد اور ڈائریکٹر جنرل سول ڈیفنس محمد علی رندھاوا سے ملاقات کی۔ اس موقع پر ممبر ایڈمنسٹریشن، ممبر اسٹیٹ اور سی ڈی اے کے دیگر سینئر افسران بھی موجود تھے۔ ملاقات انتہائی خوشگوار اور دوستانہ ماحول میں ہوئی جس میں باہمی دلچسپی کے امور، خاص طور پر اسلام آباد کی ترقی، خوشحالی ، بیوٹیفکیشن اور ماحول دوست پودے لگانے پر تبادلہ خیال کیا گیا۔
قازقستان کے سفیر یرژان کیستافین نے سی ڈی اے کے اسلام آباد کی ترقی، خوشحالی اور خوبصورتی کو مزید بہتر بنانے کے لیے کیے گئے شاندار اقدامات کی تعریف کی اور کیپیٹل ڈویلپمنٹ اتھارٹی (سی ڈی اے) کے ساتھ معاشی اور تجارتی تعاون کو بڑھانے کے عزم کا اظہار کیا۔
قازقستان کے سفیر یرژان کیستافین نے تجویز پیش کی کہ قازقستان کے دارالحکومت آستانہ میں ایک سڑک کا نام پاکستانی قوم کے بابائے قوم قائداعظم محمد علی جناح کے نام پر رکھا جائے جبکہ اسلام آباد میں قازقستان کے قومی شاعر آبائی قونانبائی کے نام پر ایک سڑک کا نام رکھا جائے۔ سڑک کے نام کی نقاب کشائی ضابطہ کی کارروائی کی منظوری کے بعدتقریب قازقستان کے صدر کے رواں برس ہونے والے دورہ پاکستان کے موقع پر کی جائے گی۔
ملاقات کے دوران چیئرمین سی ڈی اے، چیف کمشنر اسلام آباد اور ڈائریکٹر جنرل سول ڈیفنس محمد علی رندھاوا نے کہا کہ اسلام آباد اور آستانہ کے درمیان سسٹر سٹی کا تعلق ہےاس سلسلہ میں 2004 میں اسلام آباد میں ایک مفاہمتی یادداشت (ایم او یو) پر دستخط کیے گئے تھے۔ ملاقات میں سی ڈی اے کے ساتھ اہم منصوبوں پر شراکت داری کے مواقع اور امکانات پر تبادلہ خیال کیا گیا، جن میں اسلام آباد میں ایک جدید ترین ذبح خانہ کا قیام، ایک بزنس فیسلٹیشن سینٹر جہاں کاروباری خدمات ایک ہی چھت تلے دستیاب ہوں، شامل ہیں۔علاوہ ازیں ملاقات میں اسلام آباد میں صحت مندانہ سرگرمیوں کو فروغ دینے کے لئے جدید سہولیات سے لیس فٹ بال اسٹیڈیم کی تعمیر پر بھی بات چیت ہوئی۔ مزید برآں، اس سال اکتوبر میں اسلام آباد میں ہونے والی صنعتی نمائش پر بھی تبادلہ خیال کیا گیا۔ قازقستان کے سفیر یرژان کیستافین نے سی ڈی اے کو اس کے تمام منصوبوں میں اپنے ملک کی طرف سےمکمل تعاون کا یقین دلایا اور یہ طے پایا کہ سی ڈی اے اور اسلام آباد میں قازقستان کے سفارت خانے کے درمیان گہرے رابطے کیلئے دونوں اطراف سے فوکل پرسنز مقرر کئے جائیں گے تاکہ متعلقہ منصوبوں کے بارے پیش رفت کو مزید بڑھانے میں مدد مل سکے۔
چیئرمین سی ڈی اے محمد علی رندھاوا نے کہا کہ پاکستان اپنے بردرانہ ملک قازقستان کو انتہائی قدر اور عزت کی نظر سے دیکھتا ہے۔ انہوں نے اسلام آباد کو مزید خوبصورت اور ترقی یافتہ بنانے کیلئے سی ڈی اے کی کاوشوں، بالخصوص اسلام آباد میں سیاحت کو فروغ دینے کیلئے پارکوں کی بحالی، فوڈ اسٹریٹس کا قیام، ماحول دوست الیکٹرک بسیں، کیبل کار منصوبہ، تھیم اور ایڈونچر پارک جیسے اقدامات کو اجاگر کیا۔ انہوں نے باہمی دلچسپی کے مزید شعبوں کو تلاش کرنے کی ضرورت پر زور دیا اور کاروباری تعاون اور ثقافتی تعلقات کی اہمیت کو بھی واضح کیا۔
اس موقع پر دونوں اطراف نے سی ڈی اے، پاکستان اور آستانہ، قازقستان کے درمیان تعلقات اور تعاون کو مزید مضبوط بنانے کے عزم کا اعادہ کیاگیا۔ چیئرمین سی ڈی اے، چیف کمشنر اسلام آباد اور ڈائریکٹر جنرل سول ڈیفنس محمد علی رندھاوا کو قازقستان کے سفیر یرژان کیستافین نے آستانہ کے ہم منصبوں اور دیگر اسٹیک ہولڈرز کے ساتھ مستقبل میں باہمی تعاون کے نئے راستوں کو تلاش کرنے کیلئے دو طرفہ ملاقاتوں کیلئے آستانہ آنے کی دعوت دی۔
ملاقات کے اختتام پر چیئرمین سی ڈی اے، چیف کمشنر اسلام آباد اور ڈائریکٹر جنرل سول ڈیفنس محمد علی رندھاوا نے سی ڈی اے ہیڈ کوارٹرز میں قازقستان کے سفیر کو سووینئر پیش کیا۔
