پنجاب میں الیکٹرک وہیکلز کے شعبے میں بڑی پیش رفت، چینی کمپنی سکائی ویل گروپ اور محکمہ صنعت و تجارت پنجاب میں معاہدہ طے پا گیا

لاہور، 18 جون (اے پی پی): محکمہ صنعت و تجارت پنجاب اور چین کے معروف ادارے سکائی ویل نیو انرجی وہیکلز گروپ کے مابین الیکٹرک گاڑیوں کے شعبے میں سرمایہ کاری کا معاہدہ طے پا گیا۔ اس معاہدے کے تحت چین کا گروپ پنجاب کے سپیشل اکنامک زون میں 75 ایکڑ رقبے پر الیکٹرک وہیکلز کا اسمبلنگ پلانٹ قائم کرے گا، جہاں جدید ٹیکنالوجی سے مزین الیکٹرک بسیں، کاریں، ٹو ویلرز، تھری ویلرز اور دیگر ای وی مصنوعات تیار کی جائیں گی۔ معاہدے پر دستخط صوبائی وزیر صنعت و تجارت چوہدری شافع حسین اور چینی کمپنی کے سی ای او مسٹر بیون ہین نے کیے۔ اس موقع پر پیسک ہاؤس لاہور میں منعقدہ تقریب میں چینی کمپنیوں کے دیگر حکام بھی موجود تھے۔ چوہدری شافع حسین نے کہا: “چین کے سرمایہ کاروں کی الیکٹرک وہیکلز سیکٹر میں دلچسپی خوش آئند ہے۔ حکومت پنجاب، وزیراعلیٰ مریم نواز شریف کی قیادت میں، ماحول دوست ٹرانسپورٹ کے فروغ اور ای وی سیکٹر کو فروغ دینے کے لیے سنجیدہ اقدامات کر رہی ہے۔” انہوں نے مزید کہا کہ حکومت نہ صرف ای وہیکلز کی اسمبلنگ بلکہ بیٹریز، چارجنگ اسٹیشنز اور ای پروڈکٹس میں سرمایہ کاری کرنے والوں کو ہر ممکن سہولیات فراہم کر رہی ہے۔ یہ اقدام صوبے میں صنعت کاری کے فروغ اور روزگار کے مواقع پیدا کرنے کی جانب ایک اہم قدم ہے۔ معاہدے کے موقع پر سکائی ویل گروپ کے سی ای او مسٹر بیون ہین نے کہا: “ہمارا گروپ نہ صرف مقامی مارکیٹ بلکہ برآمدات کے لیے بھی الیکٹرک گاڑیاں تیار کرے گا۔ پنجاب میں سازگار ماحول اور حکومت کی سہولت کاری نے ہمیں سرمایہ کاری کی جانب راغب کیا۔” صوبائی وزیر نے اس عزم کا اعادہ کیا کہ پنجاب میں ملکی و غیر ملکی سرمایہ کاروں کو مکمل تحفظ اور سازگار کاروباری ماحول فراہم کیا جائے گا تاکہ صوبے کو صنعتی ترقی کا مرکز بنایا جا سکے۔