لاہور،08 جولائی (اے پی پی): وزیر ہاؤسنگ بلال یاسین نے کہا ہے کہ وزیراعلیٰ پنجاب مریم نواز کا صوبہ بھر میں صاف پانی کی فراہمی کے مشن کے تحت پنجاب کے 15 اضلاع میں 944 نئے فلٹریشن پلانٹس کی تنصیب کا پہلا مرحلہ شروع ہو گیا۔جنوبی پنجاب اور پوٹھوہار ریجن کے چار شہروں میں صاف پانی کی بوتلوں کے ذریعے فراہمی کیلئے پلانٹ لگانے کا فیصلہ بھی کیا گیا ہے۔
ان خیالات کا اظہار انہوں نے پنجاب صاف پانی اتھارٹی ہیڈکوارٹر میں اہم اجلاس سے اظہار خیال کرتے ہوئے کیا۔سی ای او صاف پانی اتھارٹی زاہد عزیز، ڈی جی او اینڈ ایم زوہیب بٹ نے اہداف کی تکمیل بارے تفصیلی بریفنگ دی، 2 چھوٹے اور ایک بڑے پیمانے پر سرفیس واٹر ٹریٹمنٹ پلانٹ کی تنصیب بھی پی سی ون میں شامل۔ پوٹھوہار ریجن میں ڈیم کے پانی کی ٹریٹمنٹ سے صاف پانی کی فراہمی کا بھی تفصیلی جائزہ لیا گیا۔ صوبائی وزیر نے کہا کہ وزیراعلیٰ پنجاب کی ہدایات پر صاف پانی کی فراہمی یقینی بنانے کیلئے نئے پراجیکٹس بارے تجاویز دی گئیں، پنجاب کے باسیوں کیلئے صاف پانی کے تاریخی منصوبے مرتب کیے جا رہے ہیں، وزیر ہاؤسنگ نے دہائیوں سے پنپتے مسائل پر قابو پانے کیلئے پی سی ون جلد از جلد مکمل کرنے کی ہدایات جاری کی اور کہا کہ وزیر اعلیٰ پنجاب صوبہ بھر میں صاف پانی کی فراہمی کیلئے پائیدار منصوبہ بندی کی خواہاں ہیں، سالانہ بنیادوں پر پانی کی فراہمی کے نئے پراجیکٹس پر کام کیا جائے گا۔
پارلیمانی سیکرٹری بیرسٹر سلطان باجوہ اور چیئرمین صاف پانی اتھارٹی چوہدری زاہد اکرم نے اجلاس میں شرکت کی۔
