فیصل آباد 07 جولائی (اے پی پی):صوبائی وزیر تعلیم رانا سکندر حیات کی زیر صدارت فیصل آباد اور چنیوٹ کے اضلاع کی محکمانہ کارکردگی بارے اجلاس منعقد ہوا جس میں ایڈیشنل ڈپٹی کمشنر جنرل کیپٹن (ر) طیب سمیع،ڈائریکٹر و ڈپٹی ڈائریکٹر کالجز،چیف ایگزیکٹیو آفیسر فیصل آباد، چنیوٹ و دیگر افسران نے شرکت کی۔ اس موقع پر صوبائی وزیر نے کہا کہ محکمہ تعلیم وزیر اعلیٰ پنجاب مریم نواز شریف کے ویژن کے مطابق فروغ تعلیم کے لئے عملی اقدامات کر رہا ہے۔ریشنلائزیشن پالیسی میں ہر سکول کو برابر کا فائدہ دینے کے لئے اقدامات جاری ہیں۔انہوں نے کہا کہ غیر نصابی سرگرمیوں کے فروغ کے لیے کھیلوں کے میدانوں کی مرمت و بحالی ہونی چاہیئے اور اضافی و ناکارہ فرنیچر کا ڈیٹا فوری اکٹھا کر کے قابل مرمت فرنیچر کو استعمال میں لایا جائے۔سکول ایلومینائز کو فعال کیا جائے۔ کالجز کے لئے طلبہ کی داخلہ مہم کے اہداف ہر صورت حاصل ہونے چاہیئں۔ انہوں نے ایم ڈی کیٹ اور ای کیٹ کی گورنمنٹ کالجز میں تیاری کرانے کے عمل پر اطمینان کا اظہارکیا۔اجلاس کے دوران صوبائی وزیر تعلیم رانا سکندر حیات نے نئے کلاس رومز کی تعمیر، فرنیچر کی خریداری و مرمت، سولر پینل کی تنصیب بارے اقدامات کا جائزہ لیا۔انہوں نے سکولوں میں بچوں کی داخلہ مہم،پیما کو دیئے گئے سکولوں کی کارکردگی، تعلیمی اداروں کی بیوٹیفکیشن اور پرائیویٹ سکولوں کی رجسٹریشن بارے بھی بریفنگ لی اوراجلاس میں محکمہ کالجز کو دیئے گئے حکومت پنجاب کے ٹاسکس پر عملدرآمد کا جائزہ بھی لیا۔ بریفنگ کے دوران فرسٹ ائیر داخلہ مہم کے بارے میں ٹارگٹ کو یقینی بنانے پر زور دیا گیا۔
