لاہور،08 جولائی (اے پی پی): صوبائی وزیر صحت و چیئرمین کابینہ کمیٹی برائے ڈیزاسٹر مینجمنٹ خواجہ سلمان رفیق کی پی ڈی ایم اے ہیڈ آفس آمد، خواجہ سلمان رفیق نے موسمی صورتحال اور مون سون بارشوں کا جائزہ لیا۔ ایڈیشنل ڈی جی پی ڈی ایم اے سید جواد حیدر اور ڈائریکٹر حمیداللہ ملک نے صوبائی وزیر کو مون سون بارشوں بارے بریفنگ دی۔اس موقع پراظہار خیال کرتے ہوئے خواجہ سلمان رفیق نے کہا کہ9 جولائی تک پنجاب کے دریاؤں میں پانی کی صورتحال میں غیر معمولی اضافے کا خدشہ ہے۔ دریائے چناب میں مرالہ کے مقام پر اونچے درجے کے سیلاب کی وارننگ جاری کردی گئی ہے۔انہوں نے کہا کہ ڈیرہ غازی خان کے رود کوہیوں میں فلیش فلڈنگ کی وارننگ بھی جاری کر دی گئی ہے۔ لاہور، گجرانوالہ، سیالکوٹ اور راولپنڈی ڈویژن میں اربن فلڈنگ کا خدشہ برقرار ہے۔ریسکیو 1122 کو تمام تر انتظامات کو پیشگی مکمل کرنے کی ہدایت کر دی گئی ہے۔ انہوں نے کہا کہ پی ڈی ایم اے پنجاب نے صوبہ بھر کی انتظامیہ کو مون سون بارشوں بارے الرٹ جاری کر دیا ہے۔ رواں سال مون سون بارشیں معمول سے 25 فیصد زیادہ ہونے کی پیشگوئی ہے۔ وزیر اعلیٰ پنجاب مریم نواز شریف کی ہدایات کے مطابق انتظامیہ واسا اور ریسکیو ادارے الرٹ ہیں۔ خواجہ سلمان رفیق نے کہا کہ پی ڈی ایم اے کنٹرول روم و صوبائی ایمرجنسی آپریشن سینٹرزالرٹ ہیں۔شہریوں کے تحفظ کیلئے تمام تر وسائل بروئے کار لائے جائیں گے۔واسا سمیت تمام ادارے الرٹ رہیں اور نشیبی علاقوں سے نکاسی آب کو یقینی بنائیں شہری پی ڈی ایم اے پنجاب کی جاری کردہ ہدایات پر عمل کریں ۔دریاؤں نہروں اور ندی نالوں میں ہرگز نہ نہائیں۔ صوبائی وزیر نے مزید کہا کہ انتظامیہ دریاؤں نہروں اور ندی نالوں کے اطراف دفعہ 144 کا نفاذ یقینی بنائے ۔
