سکھر،23جولائی(اے پی پی):وزیراعظم یوتھ پروگرام اور لاہور قلندرز کے تعاون سے پی سی بی گراؤنڈ سکھر میں نوجوانوں سے کرکٹ کے لیے دو روزہ ٹرائلز کا سلسلہ جاری ہے۔ پہلے دن سکھر، خیرپور، گھوٹکی، شکارپور اور دیگر اضلاع سے 15 سے 25 سال کی عمر کے سینکڑوں نوجوانوں نے ٹرائلز میں حصہ لیا، جبکہ دوسرے دن لڑکیوں کے ٹرائلز جاری ہیں۔
اس موقع پر وزیراعظم یوتھ پروگرام سندھ کے کوآرڈینیٹر فہد شفیق نے بات چیت کرتے ہوئے کہا کہ شدید گرمی کے باوجود نوجوان کرکٹ کے لیے ٹرائلز دے رہے ہیں، چیئرمین ڈسٹرکٹ کونسل کمیل حیدر شاہ نے سکھر میں مکمل تعاون کیا ہے،اس میں کوئی شک نہیں کہ سندھ حکومت کی طرف سے ہمیں پوری مدد ملی ہے، ہم چاہتے ہیں کہ سندھ کے بچے بھی قومی اور عالمی سطح پر کھیلیں، انہوں نے نوجوانوں کے لیے مشورہ دیتے ہوئے کہا کہ وزیراعظم ڈیجیٹل ہب آن لائن ایک پلیٹ فارم ہے، جہاں نوجوان اپنے لیے مواقع تلاش کر سکتے ہیں۔ انہوں نے کہا کہ پاکستان کے جس بھی شہر میں نوجوانوں کو ضرورت ہوگی، ہم وہاں مل کر مواقع فراہم کریں گے۔
لاہور قلندرز کے ہیڈ کوچ ریاض آفریدی نے کہا کہ لاہور قلندرز اور وزیراعظم یوتھ پروگرام کی ٹیلنٹ ہنٹ مہم کامیابی سے جاری ہے، یہاں بہت زیادہ ٹیلنٹ ہے، ہونہار نوجوانوں کو آگے بڑھنے کےمواقع ضرور ملنے چاہئیں،ہمیں یہاں 140کلومیٹر/ آور کی رفتار سے بولنگ کرنے والے بولر ملے ہیں، اچھے بلے باز بھی ملے ہیں۔
اس موقع پر چیئرمین ڈسٹرکٹ کونسل سکھر سید کمیل حیدر شاہ نے کہا کہ لاہور قلندرز اور وزیراعظم یوتھ پروگرام کے ٹیلنٹ ہنٹ ٹیم کے منتظمین یہاں ٹیلنٹ ڈھونڈنے آئے ہیں جس پر ان کے مشکور ہیں، نہ صرف سکھر بلکہ پورے سندھ میں ہم ان کے ساتھ مکمل تعاون کے لیے تیار ہیں۔ چیئرمین ڈسٹرکٹ کونسل سکھر نے یقین دہانی کرائی کہ ٹیلنٹ ہنٹ پروگرام کامیاب ہوگا، جس کے لیے ہمارا مکمل تعاون حاصل ہوگا۔
